Nəqliyyat, Rabitə və Yüksək Texnologiyalar Nazirliyinin də rəsmi dəstəyi ilə keçirilən "NETTY 2019" Azərbaycanın milli internet müsabiqəsinin 15-ci mükafatlandırma mərasimi keçirilib.
Tədbirdə Nəqliyyat, Rabitə və Yüksək Texnologiyalar nazirinin müavini Elmir Vəlizadə nazir Ramin Quluzadənin "NETTY" milli internet mükafatının 15 illik yubileyi münasibətilə müsabiqə iştirakçılarına ünvanladığı təbrik məktubunu oxuyub.
Sonra çıxış edən nazir müavini "NETTY" müsabiqəsinin Azərbaycanda informasiya cəmiyyətinin formalaşmasında oynadığı əhəmiyyətli roldan danışıb.
Nazir müavini bu müsabiqənin ildən-ilə inkişaf etdiyini, yeniliklərə imza atdığını diqqətə çatdırıb.
Nəqliyyat, Rabitə və Yüksək Texnologiyalar Nazirliyinin həmişə bu layihəyə dəstək olduğunu qeyd edən Elmir Vəlizadə dəstəyin davamlı olacağını vurğulayıb.
Daha sonra cari ildə müsabiqədə iştirak edən milli veb-saytların, sosial səhifələrin, proqram və layihələrin ən yaxşıları elan olunub.
"İlin İT hadisəsi" yeni açılan inzibati binada DOST (Dayanıqlı və Operativ Sosial Təminat Agentliyi) tərəfindən avtomatlaşdırılmış xidmətlərin göstərilməsi və Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən İnnovasiyalar Agentliyi tərəfindən Azərbaycanda ilk blokçeyn layihəsinin işə salınması olub.
Qalib layihələr sırasında "saglamaile.az", "atabank.com", "bildilchin.az","shekiculture.az", "local.az", "limartis.az", "4kids.az", "swtravel.az", "intangible.az", "fb.com/eVisaAzerbaijanAsan", "inloya.com", "Balta cizgi serialı", "BirBank" mobil tətbiqi yer alıb.
Milli informasiya texnologiyalarının zənginləşdirilməsinə görə mükafata Azərbaycan Milli Elmlər Akademiyasının vitse-prezidenti, AMEA İnformasiya Texnologiyaları İnstitutunun direktoru Rasim Əliquliyev layiq görülüb.
