“LG Electronics” şirkəti və “PRADA” modalar evi mobil telefon istehsalı ilə bağlı yeni əməkdaşlıq sazişi bağlayıblar. “LG” və “PRADA” 2006-cı ildə əməkdaşlığa başlayıblar və artıq 2007-ci ildə “PRADA Phone by LG 1.0” qurğusunu təqdim ediblər. Tərəflər o zaman bildirmişdilər ki, bu model ilk dəfə olaraq istifadəçilərə sensor ekran vasitəsilə idarəetmə imkanı təklif edib.
1 il sonra “QWERTY” klaviatura ilə olan “PRADA Phone by LG 2.0” telefonu işıq üzü görüb. Onun xüsusiyyəti ələ taxılan “Bluetooth-saat PRADA Link” idi. O, qurğunu çantadan və ya cibdən çıxarmadan gələn mesajları oxumağa və zəng edənin nömrəsini görmək imkanı yaradıb.
Hal-hazırda şirkətlər “PRADA Phone by LG 3.0” smartfonunu hazırlamağa başlayıblar. Bu qurğunun texniki xüsusiyyətləri haqqında informasiya hələlik yoxdur. “LG” və “PRADA” yalnız qeyd ediblər ki, yenilik satışa 2012-ci ilin əvvəlində çıxarılacaq.