2020-ci ildə “8K” televizorların qlobal tədarük həcmi 2019-cu illə müqayisədə (430 min) 2 milyon təşkil edəcək. Artım belə avadanlığın istehsalına çəkilən xərclərin optimallaşdırılması, “5G” şəbəkələrinin işə salınması və ultra yüksək dəqiqlikli televizorların tanıdılması üzrə istehsalçıların səyləri ilə izah edilir.
“ICTnews” Elektron Xəbər Xidməti “dailycomm.ru” saytına istinadən yazır ki, hazırda aşağıdakı brendlərin çeşidində “8K” televizorları var: “Samsung”, “TCL”, “Sharp”, “LG” və “Sony”. Bu yaxınlarda Tayvanın “AU Optronics” (AUO) və “Innolux” şirkətləri də bu cür displeylərin istehsalına başlayıb.
Bundan əvvəl “8K Association” beynəlxalq qeyri-kommersiya təşkilatına daxil olan “Samsung Electronics” və 15 aparıcı elektronika istehsalçısı “8K” televizorların cavab verməli olduğu standart və texniki spesifikasiyaları müəyyənləşdiriblər.
“8K” TV kateqoriyasına təsvir ölçüsü 7680x4320 piksel olan, saniyədə 24, 30 və 60 kadr tezliyinə malik və maksimal parlaqlığı 600 nitdən çox olan displeylə təchiz edilmiş televizorlar aid ediləcək. Bundan başqa, televizorda “HDMI 2.1” videoçıxışı və “HEVC” kodek dəstəyi nəzərdə tutulmalıdır.
Emil Hüseynov