“Lenovo” şirkəti ucuz qiymət seqmentində təqdim edilmiş smartfonlar üzrə istehsal xəttini genişləndirib. “Lenovo A7” adlı model böyükölçülü ekran, 8 nüvəli prosessor, ikiqat əsas kamera, həmçinin uzunmüddətli avtonom iş vaxtı kimi xüsusiyyətlərə malikdir.
“ICTnews” Elektron Xəbər Xidməti “4pda.ru” saytına istinadən yazır ki, aparat 5 mp-lik ön kameraya malik 6,09 düymlük ekranla təchiz edilib. Qurğunun əsas kamerası süni intellekt alqoritmlərinin köməyi ilə 12 səhnə tipini tanıyan 13 və 2 mp-lik iki sensordan ibarətdir. Biometrik autentifikasiya üsulu olaraq qurğunun arxa qapağında quraşdırılmış barmaq izləri skaneri təklif edilir.
Aparat, 1,6 QHs takt tezlikli 8 nüvəli “Unisoc SC9863” prosessoru və “PowerVR IMG8322/GE8322” qrafik çipi ilə təchiz edilib. Qurğunun çıxarılıb taxılan akkumulyatorunun tutumu 4000 milliamper/saat təşkil edir. İstehsalçının bəyanatına görə, aparat gözləmə rejimində 416 saat və ya musiqi dinləmə rejimində 10 saat avtonom işləyir.
Emil Hüseynov