“Cisco” şirkəti müxtəlif ölçülü ekrana malik bir neçə yeni planşet kompyuteri hazırlayır. Bu barədə müvafiq məhsul bölməsinin direktoru Çak Fontana bildirib.
Qeyd edək ki, “Cisco Cius” bu istehsalçının ilk planşetidir, o, keçən il işıq üzü görüb. Korporativ sinfə məxsus olan qurğu 7 düymlü sensor ekran, 1,6 QHz takt tezlikli “İntel Atom” prosessoru, videokonfranslar üçün ön kamera, 5 meqapiksel əsas kamera, “Wi-Fi” (IEEE 802.11a/b/g/n) kontrolleri, “3G”-modem, “Bluetooth 3.0” modulu, 32 QB tutuma malik fləş daşıyıcı və “SD” format yaddaş kartları üçün slotla təchiz edilib. Əməliyyat sistemi “Google Android”-dir.
Cənab Fontanın sözlərinə əsasən, “Cisco” şirkəti ekranı “Cius”-dan böyük olan planşet hazırlayır. Ehtimal ki, bu, təxminən 10-11 düymə malik sensor ekrandır. Qurğunu ABŞ-da 2012-ci ilin yazında təqdim etmək planlaşdırılır.
Bundan əlavə, şirkət 3,5 - 5 düymlü ekranla təchiz edilmiş mini-planşet istehsalını da nəzərdə tutur. Görünüşcə bu qurğular smartfona oxşayacaqlar.