“Panasonic” şirkəti və Yaponiyada ən böyük dəmir yolu şirkəti olan “JR East Group” yaşlı və əlil şəxslərin təhlükəsiz daşınması üçün avtomatlaşdırılmış xidməti sınaqdan keçirməyə başlayıblar. Sistem elektrikli əlil arabası ilə əlaqəli şəkildə işləyən “HOSPI Signage” robotundan ibarətdir.
“ICTnews” Elektron Xəbər Xidməti “vesti.ru” saytına istinadən yazır ki, “HOSPI” robotu maneələri dəf etməyə imkan verən sensor və kameralar, tərəflər üzrə üç böyük displey və toxunuşu dəstəkləyən displey şəklində başa malikdir, avtomatik hərəkət edən elektrik arabası isə hərəkətin izlənilməsi funksiyasını dəstəkləyir. Robot dəmir yolu stansiyasında onu çağıran şəxsi platformadakı ən yaxın liftə və ya tualetə kimi müşayiət edir.
Yeni xidmət Tokionun “Takanawa Gateway” stansiyasında sınaqdan keçirilib. Bu il istifadəyə verilmiş "gələcəyin vağzalı" müxtəlif texnologiyaların (süni intellektə əsaslanan ödəniş sisteminə malik avtomatlaşdırılmış mağazalar, QR skanerlərə malik turniketlər və “Railway Terrace Vision” rəqəmli tablosu) nümayişi üçün platforma kimi xidmət edir.
Sistem məhdud hərəkət qabiliyyətli insanlara yalnız vağzalda deyil, həmçinin şəhərdə, xəstəxanalarda və başqa yerlərdə kömək etmək üçün istifadə edilə bilər.
Emil Hüseynov