Çində keçirilən illik “MIDC 2020” konfransı çərçivəsində “Xiaomi” şirkətinin top meneceri Fan Dian “Xiaomi Vela” adlı yeni məhsul təqdim edib. “NuttX” əməliyyat sistemi əsasında işləyən “Əşyalar interneti” üçün proqram platforması şirkətin ən müxtəlif qurğularını birləşdirmək üçün nəzərdə tutulub.
“ICTnews” Elektron Xəbər Xidməti “4pda.ru” saytına istinadən yazır ki, “Xiaomi” şirkətinin “Əşyalar interneti” platforması üzrə baş direktoru deyib ki, “Xiaomi Vela” platforması “ağıllı” saatlar, fitnes trekerlər, “ağıllı” kolonkalar və “ağıllı” ev sistemi qurğularını əhatə edəcək. Şirkət müxtəlif platformaların tərtibatçıları ilə qarşılıqlı əlaqəni asanlaşdırmaq üçün açıq mənbə kodlu “NuttX” əməliyyat sistemindən istifadə edib.
Fan Dian öz çıxışında deyib ki, hazırda “Xiaomi”nin “ağıllı” qurğularının sayı 271 milyonu ötür. Yeni proqram platforması artıq tərtibatçılar üçün əlçatandır.
Emil Hüseynov