SƏFƏRLƏR

Tarix:09/06/15

İranın vitse-prezidenti Azərbaycan Pavilyonu ilə tanış olub (FOTOLAR)

Rabitə və Yüksək Texnologiyalar Nazirliyi Aparatı rəhbərinin başçılığı ilə Azərbaycanın rabitə və yüksək texnologiyalar sahəsində fəaliyyət göstərən 10-dək şirkət nümayəndələrinin daxil olduğu heyət cari ilin 9-12 iyun tarixlərində İran İslam Respublikasının Tehran şəhərində keçirilən "Inotex 2015" beynəlxalq yüksək texnologiyalar sərgisində iştirak edir.

Sərgi kompleksində Azərbaycan Pavilyonu üçün ayrılmış sahədə nümayəndə heyəti üzvləri öz məhsul və xidmətləri ilə sərgi iştirakçılarını tanış edəcək, sərgidə iştirak edən İran və digər ölkə şirkətləri ilə əməkdaşlıq imkanlarını dəyərləndirəcəklər.

Azərbaycan Pavilyonunda "Sinam" MMC, "Cybernet", "Baktelekom" şirkətlərinin məhsulları, "Azərkosmos" ASC-nin göstərdiyi xidmətlər, "Yüksək Texnologiyalar Parkı" MMC-nin və İnformasiya Texnologiyalarının İnkişafı Dövlət Fondu, habelə Teleradio İB-nin həyata keçirdiyi layihələr, o cümlədən ölkəmizin təşəbbüskarı olduğu beynəlxalq əhəmiyyət daşıyan TASİM layihəsi haqqında məlumat və təqdimatlar keçiriləcək.

Sərginin ilk günü olmasına baxmayaraq, iştirakçıların Azərbaycan Pavilyonuna hədsiz marağı hiss olunur. Açılış mərasimində iştirak edən İran İslam Respublikasının vitse-prezidenti, Mədəni İrs, Əl İşləri Sənayesi və Turizm Təşkilatının sədri Məsud Soltanifər Azərbaycan Pavilyonuna baş çəkib. Nümayəndə heyətimizin rəhbəri Vidadi Zeynalov vitse-prezidentə Azərbaycan İKT sektorunda həyata keçirilən işlər və sərgidə təqdim olunan xidmət və məhsullar barədə ətraflı məlumat verib. Məsud Soltanifərə hədiyyə edilən Azərbaycanın yerli istehsalı "Azpad" planşeti də maraqla qarşılanıb.

İranın elm və texnologiyalar naziri Məhəmməd Fərhadinin iştirakı ilə keçirilən tədbirin açılış mərasimində və sərgidə dünyanın 100-dən çox müxtəlif dövlətindən yüksək texnologiyalar sahəsində son nailiyyətlər əldə etmiş təsisatlar iştirak edir.

Nümayəndə heyəti həmçinin səfər çərçivəsində İranın elm və texnologiyalar üzrə vitse-prezidentin rəhbərliyi altında fəaliyyət göstərən "Pardis" Yüksək Texnologiyalar Parkını ziyarət edib. Bu ziyarət zamanı parkın fəaliyyəti ilə tanış olub, park rəhbərliyi ilə ikitərəfli görüş və müzakirələr aparılıb. Eyni zamanda, iki ölkənin müvafiq təsisatları arasında əməkdaşlıq perspektivləri dəyərləndirilib.

Səfər çərçivəsində nümayəndə heyəti ölkəmizin İran İslam Respublikasındakı Səfirliyində görüş keçirib, iki ölkə arasında mövcud münasibətlər və hər iki ölkədə keçirilən beynəlxalq tədbirlərdə qarşılıqlı iştirak haqqında fikir mübadiləsi aparılıb.

Baxış sayı: 2410