Tarix:29/01/16

Enerjinin simsiz ötürülməsi üzrə yeni metod təklif edilib

Alimlər enerjinin 20-30 sm məsafədən simsiz ötürülməsi nəticəsində işıq diodu lampasını yandırmağa müvəffəq olublar.

Rusiyalı alimlərin araşdırmasına əsasən, keramik dielektriklərindən istifadə nəticəsində enerjinin simsiz ötürülməsi üzrə effektiv sistemlər yaratmaq mümkündür.

“ICTnews” Elektron Xəbər Xidməti “itar-tass.com” saytına istinadən yazır ki, eksperimentin nəticələri “Applied Physics Letters” jurnalında dərc edilib.

2007-ci ildə “Science” jurnalında dərc edilmiş məqalədə Massaçusets Texnologiya İnstitutunda çalışan professorlar qrupu tərəfindən enerjinin simsiz ötürülməsi sistemi üzrə keçirilmiş uğurlu sınaqlar haqda məlumat verilmişdi. Onlar 2.5 metr məsafədə 2 mis tərkibli qarqaranın rezonans əlaqəsi hesabına 60 Vatlıq lampanı yandırmağa nail olmuşdular.

Rusiyalı alimlər həmin rezonans metoddan istifadə etsələr də, amma qurğunun konstruksiyasında müəyyən dəyişikliklər ediblər. Belə ki, onlar mis tərkibli qarqaraları keramik dielektrik rezonatorlarla əvəz ediblər.

Yeni metodun nəzəri effektivliyi 80% təşkil edir.

Xatırladaq ki, enerjinin simsiz ötürülməsi ilk dəfə Nikola Tesla tərəfindən nümayiş etdirilib. O, 1899-cu ildə simsiz enerji mənbəyindən 25 mil məsafədə yerləşmiş lüminessensiya lampalarını yandırmaq üçün enerjinin simsiz ötürülməsini göstərib. Lakin o zaman Teslanın ixtirasını həyata keçirmək üçün xüsusi generatorların qurulması maddi cəhətdən sərfəli olmayıb. Alim bu ixtirasına görə patent almayıb.

Emil Hüseynov
 

Baxış sayı: 1253

© İstifadə edilərkən İctnews-a istinad olunmalıdır