TEXNOLOJİ YENİLİKLƏR

Tarix:10/02/17

Kosmosda robot texnikasının yeni idarəetmə texnologiyası yaradılıb

Rusiyanın Uzaq Şərq Federal Universitetində kosmosda mobil robot texnikasının mini-proqramlar vasitəsilə yeni idarəetmə texnologiyası yaradılıb.

“ICTnews” Elektron Xəbər Xidməti “RİA Novosti” resursuna istinadən yazır ki, universitetdə uzaq məsafələr üçün mobil robot texnikasının idarəetmə texnologiyasının sınaqları keçirilib. Alimlər robotların avtomatik rejimdə intellektual sistemlərdən istifadə olunmaqla yerinə yetirilən mini-proqramların köməyi ilə idarə edilməsi təklifini irəli sürüblər. Texnologiya uzaq məsafələrə siqnalların ötürülməsi zamanı yubanma probleminin həllinə, eləcə də robot texnikasının, məsələn, kosmik məkanda daha stabil işinin təmininə kömək edəcək.

Layihə müəlliflərinin fikrincə, belə yanaşma ən uzaq planetlər, məsələn, Mars üçün robotların yaradılmasına imkan verəcək. Hazırda bütün dünyada bunun üzərində iş aparılır.

Məlumata görə, tədqiqat çərçivəsində, həmçinin robotlar qrupunun intellektual idarəetmə texnologiyası sınaqdan keçirilib. Moskva və Vladivostokda robot lider və idarə edilən robotlara ayrılan analoji qruplar təşkil olunub. Onların idarəetməsi növbə ilə ölkənin müxtəlif guşələrindən aparılıb: liderlərə konkret missiyanın yerinə yetirilməsi üçün mini-proqramlar göndərilib və onlar idarə edilən robotlar üçün tapşırıqları formalaşdıraraq onu yerinə yetiriblər.

Həmçinin süni intellektə malik lider robotlar qrupunu müşahidə edərək problemləri yaranan robotların tapşırıqlarına düzəlişlər edib.

Tapşırıq başa çatdıqdan sonra lider robot informasiyanı idarəetməni həyata keçirən operatora ötürüb. Öz növbəsində operator tapşırığın yerinə yetirilmə dərəcəsindən asılı olaraq ona yeni proqram göndərib.

Nizam Nuriyev

Baxış sayı: 744