TEXNOLOJİ YENİLİKLƏR

Tarix:28/07/18

Yeni üsul görmə qabiliyyətinin itirilməsinin qarşısını almağa kömək edəcək

Londonun İmperiya və Universitet kolleclərinin tədqiqatçıları kurkumin maddəsini orqanizmə çatdıran yeni üsul hazırlayıblar. Alimlərin fikrincə, bu, qlaukomanın erkən mərhələdə effektiv diaqnozlaşdırılmasına və müalicəsinə kömək edəcək.

“ICTnews” Elektron Xəbər Xidməti “RİA Novosti www.ria.ru” resursuna istinadən yazır ki, kurkumun tərkibindəki bu piqment gözün tor qişasının sinir hüceyrələrini zədələnmədən qoruyur. Əvvəllər tədqiqatçılar güman edirdilər ki, kurkumini yalnız həb şəklində qəbul etmək olar. Lakin bu üsul kurkuminin qanda yaxşı həll olunmaması səbəbindən effektiv olmayıb. Maddənin lazımi qədər dozasını əldə etmək üçün insan gündə 24 həb qəbul etməlidir ki, bu da həzm prosesində problemlər yaradır.

Alimlər bu problemi “nanodaşıyıcı” hazırlamaqla yoluna qoyublar. Nanodaşıyıcının tərkibindəki kurkumin sağlamlıq üçün zərərsiz və göz damcılarında istifadə edilən səthi-aktiv maddənin daxilində yerləşir.

Mütəxəssislərin sözlərinə görə, yeni metod kurkuminin keçiricilik qabiliyyətini 400 min dəfə artırır və maddəni göz hüceyrələrində effektiv şəkildə lokallaşdırmağa imkan verir.

Qlaukomadan əziyyət çəkən siçovullar üzərində aparılan təcrübələrdən məlum olub ki, damcı dərmanından istifadə tor qişasının deqradasiya sürətini azaldır.

Qeyd edək ki, qlaukoma göz daxilində yüksək təzyiqə görə görmə qabiliyyətinin tədricən itirilməsinə gətirib çıxaran xəstəlikdir. Qlaukoma korluğun yayılmasına görə kataraktdan sonra ikinci səbəb hesab edilir.

Nizam Nuriyev

Baxış sayı: 510