TEXNOLOJİ YENİLİKLƏR

Tarix:03/08/18

“Motorola” qabaqcıl smartfonunu təqdim edib

“Motorola” şirkəti yeni “Moto Z3” qabaqcıl smartfonunu təqdim edib. Bu aparat "5G-dək yeniləmə" imkanına malik ilk smartfon kimi xarakterizə edilir.

“ICTnews” Elektron Xəbər Xidməti “ferra.ru” saytına istinadən yazır ki, smartfonla birgə təqdim edilmiş “5G Moto Mod” panelinin qoşulması vaxtı smartfon beşinci nəsil mobil şəbəkəsini dəstəkləyir. Sözügedən panel 2000 milliamper/saat tutumunda əlavə akkumulyatora malikdir və 2019-cu ildə istifadəyə verilməsi planlaşdırılan ABŞ-ın “Verizon” operatorunun “5G” şəbəkəsinə girişini təmin edəcək.

Korpus “Corning Gorilla Glass” şüşə panelləri və alüminium çərçivədən ibarətdir. Barmaq izləri skaneri aparatın kənarında yerləşdirilib. “Moto Z3” smartfonu tərəflər nisbəti 18:9 olan 6 düymlük “Full HD+” (2160x1080 piksel) təsvir ölçülü “Super AMOLED” displey, əsas ikiqat kamera (12+12 Mp) və 8 meqapiksellik ön kamera ilə təchiz edilib.

Smartfon səkkiznüvəli “Qualcomm Snapdragon 835” prosessoru, 4 QB-lıq əməli yaddaş və 64 QB-lıq daxili fləş yaddaş (“microSD” formatlı kartların köməyi ilə yaddaşı 2 TB-dək artırmaq mümkündür), həmçinin 3000 milliamper/saat tutumlu akkumulyatorla təchiz edilib. Smartfonun ölçüləri 156,5x76,7x6,75 mm, çəkisi 156 qramdır.

Qulaqlıqlar üçün 3,5 mm-lik konnektor mövcud deyil. Smartfon “Android 8.1 Oreo” sisteminin idarəetməsi altında işləyir. “4G VoLTE”, “Wi-Fi” (802.11 ac), “Bluetooth 5 LE”, “GPS” və “NFC” texnologiyaları dəstəklənir. Suya qarşı örtük nəzərdə tutulub.

Emil Hüseynov

Baxış sayı: 946