Tarix:13/01/12

Ən kiçik maqnit yaddaş qurğusu (VİDEO)

"İBM" korporasiyası bu gün informasiyanın saxlanılması sahəsində əldə etdikləri əhəmiyyətli nailiyyət haqqında məlumat verib. 5 illik elmi işdən sonra "İBM"-in tədqiqat bölməsinə bir bit rəqəmli informasiyanın "yadda saxlanılması" üçün saxlama qurğuları tərəfindən istifadə edilən atomların sayını əhəmiyyətli dərəcədə azaltmaq müyəssər olub.

Hazırkı qurğular 1 bit informasiyanın saxlanılması üçün təxminən 1 milyon atom istifadə edirlər, lakin korporasiyadan bildiriblər ki, 1 bit məlumatın saxlanılması üçün cəmi 12 atom istifadə etməyə imkan verən həll hazırlayıblar.

Gələcəkdə bu ixtira əsasında tutumu müasir sərt disk və SSD daşıyıcılarının tutumundan on min dəfə çox olacaq məlumatların saxlanılması qurğularını istehsal etmək mümkün olacaq.

Tədqiqat layihəsinin rəhbəri Andreas Haynrixdir. "İBM Research"-dən bildiriblər ki, hətta yeni məhsula mühafizəkar yanaşsaq belə, artıq onun istifadəsinin ilk mərhələsində indiki kimi 1 terabayt tutumlu sərt disklər deyil, 100 və ya 150 terabayt və daha çox tutuma malik sərt disklər istehsal etmək mümkün olacaq.

Baxış sayı: 2600

© İstifadə edilərkən İctnews-a istinad olunmalıdır