PROQRAM TƏMİNATI

Tarix:21/01/12

Məşhur fayl mübadiləsi xidməti bağlanıb

Virciniyanın (ABŞ) federal ittihamçıları məşhur “Megaupload” fayl mübadiləsi xidmətinin bağlanması haqqında qətnamə çıxarıblar. Buna səbəb isə xidmətin qeyri-leqal məzmunu yaymasıdır.

“Megaupload” fayl mübadiləsi xidmətində məzmunun bir hissəsi pulsuz yayılırdı, bəzi hissəsinə görə isə pul alınırdı. Bundan əlavə, resursun yaradıcıları yüksək sürətdə premium-giriş hesabının verilməsi və reklam nəticəsində də gəlir əldə edirdilər.

“Megaupload” xidmətində təxminən 150 milyon qeydiyyatdan keçmiş istifadəçi var idi və o, nə vaxtsa ən çox ziyarət edilən veb-saytların siyahısında 13-cü yerdə olub.

Artıq xidmətin bir neçə meneceri, həmçinin resursun 37 yaşlı təsisçisi Kim Dotkom (Kim Dotcom) həbs edilib. Onlar qeyri-leqal multimedia məzmununun yayılmasına kömək etməkdə təqsirli sayılırlar.

“Anonymous” haker qrupu “Megaupload” xidmətinin bağlanmasına dərhal cavab verib. Belə ki, ABŞ-ın bir hökumət təşkilatlarının saytlarına, mediaşirkətlərə kütləvi hücum edilib. Saytların bir çoxuna bir neçə saat ərzində daxil olmaq mümkün olmayıb.

Baxış sayı: 1435