İNTERNET

Tarix:28/03/12

Mingəçevir “WiMAX” texnologiyası ilə geniş zolaqlı internetə çıxış imkanı əldə edəcək

Tezliklə Mingəçevirin hər tərəfində “WiMAX” texnologiyası ilə geniş zolaqlı internetə çıxış olacaq. Bu barədə “İCTnews” Elektron xəbər xidmətinə “KÜR” Elektron Avadanlıqları İstehsalı müəssisəsinin direktoru Rizvan Osmanov məlumat verib. Drektor bildirib ki, Mingəçevir şəhərinin hər yerində simli geniş zolaqlı internet təmin etmək mümkün deyil.

Bunun isə bir çox səbəbləri var: ”Birləşdirici sim xətlərinin həddindən artıq zəif olması, yeni yaranmış yaşayış məntəqələrinin DSLM avadanlıqlarının lazımi sayda olmaması, bağ evlərinin çox uzaq məsafədə olması və s. kimi amillər bu səbəblərdəndir. Hal-hazırda tətbiq edilən simsiz geniş zolaqlı internet rabitəsi “WiMAX” Mingəçevir şəhərinin hər tərəfini geniş zolaqlı internet rabitəsini saniyədə 10 Mbt qədər təmin edə biləcək”.

R.Osmanov bununla da istifadəçilər üçün xeyli rahatlıq yaradılacağını deyib: ”Əvvəllər demək olar ki, burada internetdən həm bağda, həm yolda istifadə etmək mümkün deyildi. “WİMAX” internet rabitəsi ilə isə istifadəçilər həm evdə, həm bağda, həm də yolda faydalana biləcəklər. Bundan başqa, siz istifadəçilər internetdən Bakı şəhərində də heç bir əlavə tədbir görmədən sərbəst olaraq faydalana biləcəklər”.

USB modem üzərindən internetin səmərəsini vurğulayan müəssisə rəhbərinin sözlərinə görə, bu variantın üstünlüyü çox geniş imkanlara malik olmasıdır: ”Bu modemlə istifadəçi Mingəçevir və Bakı şəhərinin hər tərəfində internetin yayım səviyyəsinə görə internet rabitəsindən istifadə edə bilər. Tezliklə bu internet rabitə şəbəkəsi Azərbaycanın digər şəhərlərində də inkişaf edəcək və istifadəçilərin “rominq” istifadəsi genişlənəcək”.

HƏQİQƏT

Baxış sayı: 890