İNTERNET

Tarix:25/05/12

TQDK-nın internet saytında test tapşırığı nümunələri yerləşdirilib

Tələbə Qəbulu üzrə Dövlət Komissiyası (TQDK) tərəfindən buraxılış imtahanlarına hazırlaşan şagirdlərə kömək məqsədilə Ana dili və riyaziyyat fənlərindən test tapşırığı nümunələri və təqdim ediləcək yazı işlərinin mövzuları komissiyanın internet saytında yerləşdirilib.

Bu barədə “İCTnews” elektron xəbər xidmətinə Tələbə Qəbulu üzrə Dövlət Komissiyasından məlumat verilib. Komissiyadan bildirilib ki, TQDK iyun ayının 2-də və 3-də respublikanın bütün orta ümumtəhsil müəssisələrində mərkəzləşdirilmiş qaydada ilk buraxılış imtahanlarını keçirəcək. İlk buraxılış imtahanı iyunun 2-də və 3-də Bakı şəhərində olacaq.

İyunun 2-də saat 11:00-da buraxılış sinfinin XI, iyunun 3-də saat 11:00-da isə IX sinif şagirdləri öz biliklərini nümayiş etdirəcəklər. Eyni gündə Gəncə, Sumqayıt, Abşeron, Mingəçevir, Yevlax, Lənkəran, Quba, Qusar və Xaçmaz rayonlarının rus bölməsi şagirdləri də imtahan verəcəklər. İyunun 3-də orta ümumtəhsil müəssisələrinin IX siniflərində təhsil alan şagirdlərin buraxılış imtahanlarının keçirilməsi üçün Bakı şəhərində ümumilikdə 68 imtahan mərkəzi ayrılıb.

Buraxılış imtahanının qaydalarına görə, imtahan ana dili (Azərbaycan bölməsinin şagirdləri üçün -Azərbaycan dili, rus bölməsinin şagirdləri üçün - rus dili fənni) və riyaziyyat fənləri üzrə keçirilir. Şagirdlərə hər bir fənn üzrə 30, ümumilikdə 60 test tapşırığı təqdim edilir. Bundan əlavə, şagirdlər təqdim edilmiş mövzu üzrə yazı işi yerinə yetirirlər.

HƏQİQƏT

Baxış sayı: 14374