İNTERNET

Tarix:13/08/12

“Google” şirkəti piratları cəzalandıracaq

"Google" şirkəti oğurluq və lisenziyasız məzmunun yerləşdirildiyi saytların operatorlarını özünəməxsus şəkildə cəzalandırmağa qərar verib. "Google"-un bloqunda dərc edilmiş yazıya görə, şirkət müəlliflərdən (hüquq sahibləri) həddindən artıq şikayət alan saytların cəzalandırılmasını nəzərdə tutan yeni tədbirləri inkişaf etdirir.

"ICTnews.az" elektron xəbər xidməti "cybersecurity.ru" saytına istinadən bildirir ki, reytinqin qiymətləndirilməsi sisteminə əlavə edilmiş "piratçılıq əleyhinə tədbir" adlı yeni parametr hüquq sahiblərindən şikayətləri qeydə alır. Hər yeni şikayət saytın reytinqini azaldacaq və onun axtarış nəticələrindəki yeri aşağı düşəcək.

Analitiklər bildiriblər ki, "Google" axtarış sistemi bir çox istifadəçilər üçün lisenziyasız məzmunun axtarılması alətlərindən birinə çevrilib. "Google" əvvəllər piratlara yardımçı olduğuna görə xeyli tənqid olunurdu.

Lakin son illər ərzində internet-şirkət axtarış indeksinin pirat materiallardan təmizlənməsi üçün çox səy göstərir. "Reytinqin dəyişdirilməsi proseduru axtarışın keyfiyyətini yüksəltməlidir" – "Google" şirkətinin xəbərində belə qeyd olunub.

EMİL

Baxış sayı: 1486