İNTERNET

Tarix:14/08/12

Soydaşlarımızın yığcam yaşadığı regionlarda “Azərbaycan diasporu informasiya mərkəzi” yaradılacaq

Xarici ölkələrdə azərbaycanlıların yığcam yaşadığı regionlarda şəbəkələrə malik "Azərbaycan diasporu informasiya mərkəzi"nin yaradılması təklif olunur. Təklif bu günlərdə Türkiyənin Bodrum şəhərində "Xarici ölkələrdə yaşayan azərbaycanlıların cəmiyyətə inteqrasiyası: mövcud vəziyyət və perspektiv gözləntilər" mövzusunda keçirilən forumun IV panel iclasında qərara alınıb

. "ICTnews" elektron xəbər xidmətinə bu barədə Diasporla İş üzrə Dövlət Komitəsindən (DİDK) məlumat verilib. Komitədən bildirilib ki, forumun yekun sənədi - "Azərbaycan diaspor təşkilatları rəhbərlərinin "Xarici ölkələrdə yaşayan azərbaycanlıların cəmiyyətə inteqrasiyası: mövcud vəziyyət və perspektiv gözləntilər" mövzusunda Forum iştirakçılarının birgə bəyanatı"nda bu təkliflə yanaşı, digər təkliflər də yer alıb.

İyirmi beş bənddən ibarət olan sənəddə gənclərin və qadınların diaspor quruculuğu işinə daha fəal şəkildə cəlb olunması, lobbi quruculuğu sahəsində fəaliyyətin genişləndirilməsi, "Xocalıya ədalət – Qarabağa azadlıq" beynəlxalq kampaniyasına dəstəyin gücləndirilməsi, xaricdə yaşayan azərbaycanlı uşaqlar üçün Azərbaycanda yay düşərgələrinin təşkili ilə əlaqədar müvafiq dövlət orqanlarına müraciət edilməsi də nəzərdə tutulub.

Bundan başqa, tədbirdə "Virtual həftə sonu" məktəbinin fəaliyyətinin təkmilləşdirilməsi, "Avropa İttifaqı ölkələrində azərbaycanlıların cəmiyyətə inteqrasiya prosesləri: mövcud təcrübə, problemlər və onların həlli yolları" mövzusunda forumun keçirilməsi, növbəti Rusiya-Azərbaycan iqtisadi forumunun Ulyanovsk şəhərində təşkili üçün Azərbaycan Respublikasının Nazirlər Kabinetinə müvafiq təkliflərin verilməsi də qərara alınıb.

HƏQİQƏT

Baxış sayı: 744