İNTERNET

Tarix:22/08/12

"Yahoo!"nun prezidenti işçilərinə səxavətli davranır

"Yahoo!" şirkətinin 37 yaşlı yeni rəhbəri Marissa Mayer əməkdaşların işinin təşkili ilə ciddi şəkildə məşğul olmağa başlayıb. Əvvəlcə işçiləri pulsuz naharla təmin edən "Google"-un keçmiş vitse-prezidenti indi də onlara iPhone paylamaq barədə düşünür.

O, internet-korporasiyanın bütün işçilərinin eyni platformalı telefondan istifadə etməsinin əmək məhsuldarlığının artmasına səbəb olacağı qənaətindədir. Hazırda şirkətin işçi heyəti əsasən BlackBerry modelinə üstünlük verir.
Bununla belə, Android-smartfonlar və iPhone-dan adətən ikinci aparat qismində – işdənkənar ünsiyyət vasitəsi kimi istifadə edilir. Hər bir əməkdaş üçün iPhone modelinin (və ya Android bazasında modelin alınması – M.Mayer belə variantı da nəzərdən keçirir) alınması "Yahoo!"-ya təxminən 2 milyon dollara başa gələcək.

Bu, şirkətin təxminən 2 milyard dollar vəsaitə malik olmasını nəzərə alsaq, o qədər də böyük məbləğ deyil.

Baxış sayı: 897