İKT

Tarix:30/08/12

Azərbaycan MDB ölkələrinin mal və xidmətlərin mobil ödəniş sistemindən istifadə təcrübəsini öyrənəcək

Azərbaycan MDB ölkələrinin mal və xidmətlərin mobil ödəniş sisteminin hazırlanması və tətbiqi sahəsində təcrübəsi ilə tanış olacaq.

Bu məsələyə Elektrorabitə Operatorları Şurası, Regional Rabitə Əməkdaşlığı (RRƏ) və RRƏ-nin elektrorabitə üzrə komissiyasının birgə iclası çərçivəsində baxılacaq. İclas sentyabrın 27-28-də Qazaxıstanda keçiriləcək.

İclas iştirakçıları ödəniş kartları və qarşılıqlı hesabların tətbiqi ilə ödənişlərin həyata keçirilməsi imkanlarını müzakirə edəcəklər.

İclasda, həmçinin yerli tənzimləmə orqanlarının rabitə sahəsində mobil telefoniyanın pərakəndə bazarının nizamlanması məsələlərində iştirakı, rəqəmsal yayım xidməti üzrə tariflərin formalaşdırılması prinsipləri, yeni nəsil şəbəkələrinin kompleks xidmətləri nəzərdən keçiriləcək.

Tərəflər elektrorabitə xidmətlərinə görə qiymət müəyyənləşdirmə və beynəlxalq hesablaşma məsələləri üzrə təcrübə mübadiləsi aparacaqlar.

Gündəliyə, həmçinin Beynəlxalq Telekommunikasiya Şurası, Elektrorabitənin Standartlaşdırılması üzrə Ümumdünya Assambleyası və 2012-ci il Beynəlxalq Elektrorabitə üzrə Ümumdünya Konfransının tədbirlərinə RRƏ rabitə administrasiyalarının hazırlanması məsələsi daxil edilib.

Baxış sayı: 1197