İKT

Tarix:18/10/12

«İnformasiya Sisteminin yaradılmasının əsas hədəflərindən biri dövlət büdcəsinə daxil olan vəsaitlərin avtomatik uçotunun qurulmasıdır»

Maliyyə Nazirliyinin (MN) Dövlət Xəzinədarlığı Agentliyində tətbiq edilən “Xəzinədarlığın İnformasiya İdarəedilməsi Sistemi” (XİİS) layihəsi Almaniyanın “SAP AG” şirkəti tərəfindən “SAP Quality Award 2012 for CİS” (Gold Winner) Qızıl Mükafatına layiq görülüb. Bu barədə “ICTnews” elektron xəbər xidmətinə MN-in mətbuat xidmətinin rəhbəri Mais Piriyev məlumat verib.

Onun sözlərinə görə, nazirliyin Dövlət Xəzinədarlığı Agentliyində dünya miqyasında geniş tətbiq edilən, biznes proseslərinin idarə olunmasında mütərəqqi proqram təminatı hesab edilən “SAP ERP” həlli əsasında “Xəzinədarlığın İnformasiya İdarəedilməsi Sistemi” tətbiq olunub: «Dövlət Xəzinədarlığında maliyyə əməliyyatlarının avtomatlaşdırılması məqsədini daşıyan sistem Almaniyanın “SAP AG” şirkəti tərəfindən keçirilən MDB ölkələrində "Böyük şirkətlərdə SAP proqram təminatının tətbiq edilməsi" kateqoriyası üzrə müsabiqədə qalib gəlib və “SAP Quality Award 2012 for CİS” (Gold Winner) Qızıl Mükafatına layiq görülüb. Qiymətləndirmənin kriteriyalarına SAP-ın keyfiyyət prinsipinə əməl olunması parametri, effektivlik, həmçinin layihələrin unikal xüsusiyyətləri nəzərə alınmaqla tətbiqin rentabelliyi və məcmu dəyəri kimi əsas göstəricilər daxil olunur».

M.Piriyev bildirib ki, İnformasiya Sisteminin yaradılmasının əsas hədəfləri xəzinədarlıq vasitəsilə büdcə xərclərinin icra mexanizminin təkmilləşdirilməsi, dövlət büdcəsinə daxil olan vəsaitlərin avtomatik uçotunun qurulması, onların daha səmərəli istifadə edilməsi, bu sahədə şəffaflığın artırılması, risklərin minimallaşdırılması və pul vəsaitlərinin çevik idarə olunması, məlumatların daha operativ emal edilməsindən ibarətdir. Onun sözlərinə görə, “SAP AG” şirkəti idarəetmədə tətbiq olunan proqram təminatı üzrə dünyanın qabaqcıl şirkətlərindən biri olaraq 25-dən artıq sahədə xidmət göstərir. Şirkətin 120 ölkədə 82000-dən çox müştərisi mövcuddur.

SEYMUR

Baxış sayı: 1170