İKT

Tarix:19/10/12

“İnformasiya-kommunikasiya texnologiyalarının tətbiqi” mövzusunda 6-cı beynəlxalq konfrans keçirilir

Gürcüstanın paytaxtı Tbilisidə “İnformasiya-kommunikasiya texnologiyalarının tətbiqi” mövzusunda 6-cı beynəlxalq konfrans bu gün başa çatacaq. Konfrans Gürcüstan Təhsil və Elm Nazirliyi, Tbilisi Beynəlxalq Qaradəniz Universiteti, Qafqaz Universiteti (Azərbaycan), İ.Cavaxişvili adına Tbilisi Dövlət Universiteti və Gürcüstan Texniki Universitetinin təşkilatçılığı ilə keçirilir.

Konfransın keçirilməsində məqsəd informasiya-kommunikasiya texnologiyaları sahəsində əldə edilmiş yüksək innovativ elmi nəticələrlə bağlı bilik və təcrübə mübadiləsi aparmaqdır.

Tədbirdə informasiya-kommunikasiya texnologiyalarının təhsil, elm, iqtisadiyyat, biznes, səhiyyə, idarəetmə, dövlət strukturlarında və digər sahələrdə tətbiqinin daha da yaxşılaşdırılması yolları müzakirə olunur. Konfransın təşkilatçısı olan universitetlərin rektorları gündəlikdə duran məsələlərlə bağlı çıxış edirlər.

Tbilisi Beynəlxalq Qaradəniz Universitetinin rektoru Ercan Tunc bildirib ki, konfrans naqilsiz internet, 3 və 4-cü nəsil mobil texnologiyaların inkişafına əsaslanan müxtəlif texniki məsələlərin müzakirəsi baxımından mühüm əhəmiyyət kəsb edir:

“Burada müxtəlif elm sahələrində çalışan gənc alim və mütəxəssislərə elmi axtarışlarının nəticələrini təqdim etmək üçün yaxşı şərait yaradılıb”.

Qeyd edək ki, konfransda 20-dən çox ölkədən 70-ə yaxın nümayəndə iştirak edir. Azərbaycandan isə tədbirə 20-yə yaxın elm xadimi qatılıb.
2009-2011-ci illərdə belə bir konfrans Bakıda keçirilib. Konfransın 2013-cü ildə də Bakıda təşkili planlaşdırılır.

RƏVAN

Baxış sayı: 2378