İKT

Tarix:16/01/13

Rasim Əliquliyev: “Ötən il İKT sektoru üçün çox uğurlu olub”

Azərbaycanda müvəffəqiyyətlə həyata keçirilən sosial-iqtisadi siyasət digər sahələrdə olduğu kimi, rabitə və informasiya texnologiyaları sektorunda da mühüm təsirini göstərməkdədir.

"ICTnews.az" elektron xəbər xidmətinin məlumatına görə, bu barədə Azərbaycan Milli Elmlər Akademiyasının İnformasiya Texnologiyaları İnstitutunun direktoru, professor Rasim Əliquliyev danışıb. Direktorun sözlərinə görə, ötən il İKT sektoru üçün çox uğurlu nəticələrlə yadda qalıb. Onun qənaətincə, həyata keçirilmiş investisiya layihələri nəticəsində mühüm uğurlar əldə edilib.

R.Əliquliyev bildirib ki, ölkəmizdə informasiya cəmiyyəti quruculuğu dövlətin əsas prioritetlərindən biri kimi uğurla həyata keçirilir: «Bu siyasətin əsası ümummilli liderimiz Heydər Əliyev tərəfindən qoyulub. Bu strateji istiqamət ulu öndərin siyasi kursunun davamçısı, Prezident cənab İlham Əliyev tərəfindən uğurla davam etdirilir. "Elektron Azərbaycan" Dövlət Proqramının birinci mərhələsi çərçivəsində ölkəmizdə İKT sektorunun inkişaf etdirilməsi, informasiya cəmiyyətinin qurulması istiqamətində bir sıra uğurlara nail olunub.

Hazırda müvafiq dövlət proqramının ikinci mərhələsi üzrə tədbirlər həyata keçirilir. Bu mərhələdə informasiya cəmiyyətinin tələblərindən irəli gələn dövlət informasiya sistemlərinin inkişafına, informasiya təhlükəsizliyinin təmin edilməsinə, elektron imza və elektron sənəd dövriyyəsinin tətbiqinə, elektron xidmətlərin təşkilinə, ayrı-ayrı sahələr üzrə İKT-nin tətbiqinin genişləndirilməsinə, internetdən istifadə səviyyəsinin artırılmasına və İKT üzrə kadr hazırlığına dair məsələlərin həlli nəzərdə tutulur".

SEYMUR

Baxış sayı: 810