İNTERNET

Tarix:05/02/13

Yaxın günlərdə “ASAN xidmət” mərkəzi səyyar xidmətlərə başlayacaq

Hazırda 1 saylı Bakı “ASAN xidmət” mərkəzində xidmətlər bir neçə formada göstərilir. Bu barədə “ASAN xidmət” mərkəzindən verilən məlumatda bildirilir. Məlumatda qeyd edilir ki, bunlardan biri birbaşa xidmətdir. Yəni vətəndaşa “ASAN xidmət” mərkəzində müraciət etdiyi dövlət orqanı tərəfindən bilavasitə xidmət göstərilməsidir.

Digər xidmət növü isə özünəxidmətdir. Özünəxidmət dedikdə mərkəzlərdə daim internetə açıq olan kompüterlər vasitəsilə vətəndaşların bütün növ elektron xidmətlərdən yararlana bilmək imkanı nəzərdə tutulur. Kompüteri olmayan vətəndaşlar mövcud elektron xidmətlərdən yararlanmaq üçün “ASAN xidmət” mərkəzinə gəlib daim internetə açıq kompüterlərdən istifadə edə bilərlər. Həmçinin dövlət orqanlarının saytları vasitəsilə göstərilən elektron xidmətlərdən istifadə etməkdə çətinlik çəkən vətəndaşlar “ASAN xidmət” əməkdaşlarının köməyindən yararlana bilərlər.

Yaxın vaxtlarda səyyar xidmət də göstərilən xidmət növləri sırasına qatılacaq. Səyyar xidmətlər dedikdə, vətəndaşın qanunla nəzərdə tutulmuş qaydada əlavə ödəniş aparılmaqla iş və ya yaşayış yerini tərk etmədən xidmətlərdən yararlanması nəzərdə tutulur. Yəni xidmətin həyata keçirilməsi üçün tələb edilən və xidmətin nəticəsi olaraq vətəndaşa verilməli olan sənədlər onun yaşayış və ya iş yerində təhvil götürülə və təhvil verilə bilər.

Səyyar xidmətlər kənardan qulluğa və yardıma ehtiyacı olan əlillər və sağlamlıq imkanları məhdud uşaqlar üçün əlavə ödəniş aparılmadan həyata keçiriləcək. Hazırda səyyar xidmətlərin həyata keçirilməsi ilə bağlı hazırlıq işləri aparılır. Yaxın vaxtlarda xidmətlərin həyata keçirilməsinə başlanması nəzərdə tutulur.

RƏVAN

Baxış sayı: 861