İNTERNET

Tarix:28/03/13

“Azerdict”in internet səhifəsi yenilənib

Azərbaycanca dil və lüğət xidməti – "Azerdict"in saytının yeni versiyası istifadəyə verilib. "ICTnews" elektron xəbər xidmətinin "www.azerdict.com " saytına istinadən verdiyi məlumata görə, saytdakı dəyişikliklər sırf kosmetik xarakter daşımır, saytın daha sürətli fəaliyyət göstərə bilməsi və optimallaşdırılması üçün bütün kodları yenidən və ən son yeniliklərdən istifadə edilərək yazılıb.

Saytın bir neçə bölməsi müvəqqəti, bəzi funksiyaları isə həmişəlik yeni versiyada dayandırılıb. Bu bölmələrdən Rusca-Azərbaycanca lüğət, "Bunu nəzərdə tutursunuz" (Did you mean) funksiyası, eləcə də köhnə versiyada da fəaliyyətini dayandırmış Sual-Cavab bölməsi daha fərqli tərtibatda yenidən ən qısa müddətdə istifadəyə veriləcək.

Aforizmlər bölməsi isə saytın ümumi fəaliyyət istiqamətilə üst-üstə düşmədiyi üçün komandanın ortaq qərarı ilə ləğv edilib. Günün sözü və buna abunəlik qeyri-müəyyən müddətə qədər ləğv olunub, amma saytın gələcək versiyalarında bunların da daxil edilməsi nəzərdə tutulub.

Saytla bağlı ən böyük yenilik isə saytın dizaynı ilə bərabər, loqosunun minimalist və modern tərtibatda dəyişdirilməsidir. Bundan başqa ingiliscə sözlərin səsli tələffüzü, avto-tamamlama (autocomplete) funksiyası da yeni versiyada öz əksini tapıb. Köhnə saytın bloq bölməsi "wordpress" əsasında qurulduğu halda yeni versiyada bu bölmə sıfırdan kodlaşdırılaraq saytla inteqrasiya edilib.

CAHANGİR

Baxış sayı: 2137