İNTERNET

Tarix:17/04/13

Genişzolaqlı internet xidmətlərindən optik bağlantı əsasında istifadəyə üstünlük verilir

BTRİB tərəfindən aparılan araşdırmaların nəticəsində məlum olub ki, şəbəkənin xidmətlərindən istifadə edən təşkilatlar və müəssisələrin 90%-i genişzolaqlı internet xidmətlərindən optik bağlantı əsasında istifadəyə üstünlük verir.

Birliyin texniki direktoru Rəsul Qurbanovun sözlərinə görə, BTRİB bu amili və eyni zamanda göstərdiyi internet xidmətlərinin keyfiyyətini artırmaq üçün kənar provayder və operatorlarla birgə təşkilatlara, biznes mərkəzlərə, mehmanxanalara optik kabel çəkməklə abunəçilərə yaxın ərazilərdə İAD, mini-DSLAM və ONU avadanlıqları quraşdırmaqla telefon və genişzolaqlı xidmətləri göstərir.

Eyni zamanda şəbəkə ATS-dən 2 km-dən yuxarı məsafədə yerləşən telefon paylayıcı şkafları "SMART AX" avadanlıqları ilə dəyişdirərək abunəçilərə göstərilən xidmətlərin keyfiyyətinin yaxşılaşdırılması üçün tədbirlər həyata keçirir. Həyata keçirilən bu layihələrin tətbiqi nəticəsində "ADSL 2+" texnologiyası ilə 24MB/s-yə qədər assimmetrik, VDSL texnologiyası ilə abunəçi xəttinin uzunluğu 1,5 km-ə qədər 10 MB/s simmetrik internet və keyfiyyətli İPTV xidməti göstərilmə imkanının yaradılması təmin olunur.

Hal-hazırda şəhərin əsasən mərkəzi hissəsində mis kabellərdən istifadəni məhdudlaşdırmaqla yeni yaşayış binalarına optik kabel vasitəsilə istifadəçilərə İKT xidmətlərinin göstərilməsi üçün BTRİB tərəfindən yeni pilot layihələrin həyata keçirilməsi üçün işlər aparılır.

RƏVAN

Baxış sayı: 784