İKT

Tarix:13/05/13

“AtaTexnologiya” İKT ilə bağlı yazılı inşa müsabiqəsi elan edib

"AtaTexnologiya" MMC tələbələr arasında informasiya-kommunikasiya texnologiyaları sahəsində yazılı inşa müsabiqəsini elan edir. Müsabiqə mayın 15-dən iyunun 15-nə qədər davam edəcəkdir.

İKT ideyaları daha maraqlı olan müsabiqə qalibləri "AtaTexnologiya" MMC-də təcrübə keçmək imkanı əldə edəcəklər. Bu aksiya İKT nailiyyətlərinin geniş yayılması və istedadlı gənclərə dəstək məqsədilə keçirilir."AtaTexnologiya" MMC-nin direktoru Mais Yusifov müsabiqənin əhəmiyyətindən danışaraq bildirib: "Məlum olduğu kimi, Azərbaycan Respublikası Prezidenti İlham Əliyev tərəfindən bu il "İnformasiya-kommunikasiya texnologiyaları ili" elan edilmişdir. Bunu nəzərə alaraq, şirkətimiz bununla ölkə İKT sektorunun inkişafına gənc mütəxəssislərin cəlb edilməsi üzrə öz töhfəsini vermək qərarına gəlmişdir. Azərbaycan bazarına İKT-nin son nailiyyətlərini və texnologiyalarını tətbiq etməklə yanaşı, biz öz fəaliyyətimizlə yüksək ixtisaslı gənc kadrların hazırlanması problemini həll etməyə çalışırıq".

Müsabiqədə iştirak etmək arzusunda olan tələbələr İKT ilə bağlı inşalarını "dzamanova@ataholding.az" elektron poçtuna göndərə bilər.

"AtaHolding" ASC-nin tərkib hissəsində fəaliyyət göstərən "AtaTexnologiya" MMC 2005-ci ilin may ayında yaradılıb. İnformasiya texnologiyaları sahəsində geniş xidmətlər spektri təqdim edən şirkət banklar, iri müəssisə və təşkilatlar üçün proqram təminatı məhsulları bazarında ixtisaslaşıb.

RƏVAN

Baxış sayı: 1003