İKT

Tarix:21/05/13

Naxçıvanda yeni mobil cihazların qeydiyyatının aparılması üçün lazımi şərait yaradılıb

Yeni mobil cihazların qeydiyyatının yüksək səviyyədə təşkil edilməsi üçün Naxçıvan Şəhər Rabitə İdarəsinin Naxçıvan şəhəri, Atatürk küçəsi 1 ünvanında yerləşən müştərilərə xidmət zalında müvafiq şərait yaradılıb. "ICTnews" elektron xəbər xidməti xəbər verir ki, bu barədə Naxçıvan Muxtar Respublikasının Rabitə və İnformasiya Texnologiyaları Nazirliyinin məlumatında deyilir.

Məlumatda bildirilir ki, qeydiyyatın aparılması üçün vətəndaşın şəxsiyyət vəsiqəsini və mobil telefonunu özü ilə gətirməsi vacibdir. Sakinlər Rabitə və İnformasiya Texnologiyaları Nazirliyinin "209" nömrəli "qaynar xətt"indən və mobil operatorların müştəri xidmətlərindən ətraflı məlumat əldə edə bilərlər.

Qeyd edək ki, mobil cihazların qeydiyyat sistemi muxtar respublikada Naxçıvan MR Nazirlər Kabinetinin 17 yanvar 2012-ci il tarixli Qərarı ilə təsdiq edilmiş "Mobil cihazların qeydiyyatının aparılması Qaydası"na uyğun olaraq həyata keçirilir. Mobil cihazların qeydiyyat sisteminin yaradılması "İnformasiya-kommunikasiya texnologiyaları ili" çərçivəsində həyata keçirilən tədbirlər sırasındadır. Məlumat üçün bildirək ki, şəxsi istifadə məqsədilə ölkə ərazisinə gətirilən hər bir mobil cihazın "İMEİ" nömrəsi həmin cihazın şəbəkədən xidmət almağa başladığı tarixdən ən geci 30 gün müddətində qeydiyyatdan keçirilməlidir.

Bu qayda respublikaya gələn xarici qonaqlar, turistlər tərəfindən xarici ölkə operatorunun SİM kartı ilə rouminq xidmətindən istifadə edilən cihazlara şamil olunmur. Yəni onlar xarici ölkə operatorlarının SİM kartları ilə işləyən cihazlardan maneəsiz olaraq istifadə edə bilərlər.

Qeydiyyat sistemi istismara başladığı tarixədək ölkədə mobil rabitə şəbəkələrində istifadə edilən bütün mobil cihazların "İMEİ" nömrələri qeydiyyata alınmış hesab edilir və onların şəbəkədə maneəsiz işləməsində heç bir problem yaşanmayacaq.

CAHANGİR

Baxış sayı: 878