İKT

Tarix:28/06/13

Seneqal nümayəndə heyəti gömrük sistemində tətbiq edilən İKT təcrübəsi ilə tanış olmaq üçün Azərbaycana səfər edəcək

Seneqal Gömrük Xidməti yaxın zamanlarda böyük nümayəndə heyəti ilə Azərbaycana səfər edəcək. Səfərdə məqsəd gömrük sistemində informasiya-kommunikasiya texnologiyalarının, o cümlədən "Vahid Pəncərə" prinsipinin tətbiqi, kadr potensialının gücləndirilməsi, kinoloji xidmət itlərinin təlimi və s. sahələrdə Azərbaycanın qazandığı uğurlarla tanış olmaqdır.

Görüş razılığı Belçika Krallığının Brüssel şəhərində, Ümumdünya Gömrük Təşkilatının Baş qərargahında keçirilən Gömrük Əməkdaşlıq Şurasının 121/122-ci sessiyası zamanı əldə olunub. Dövlət Gömrük Komitəsindən (DGK) bildirilib ki, sessiyanın işinə DGK sədri, gömrük xidməti general-leytenantı Aydın Əliyevin rəhbərliyi ilə nümayəndə heyəti də qatılıb.

Səfər zamanı Azərbaycan və Seneqal gömrük xidmətlərinin Şura Sessiyasında iştirak edən nümayəndə heyətləri arasında gələcək əməkdaşlıq perspektivlərinin müzakirəsinə dair ikitərəfli görüş keçirilib. A.Əliyev Azərbaycan gömrük xidmətinin öz təcrübəsini seneqallı həmkarları ilə bölüşməyə hazır olduğunu vurğulayıb.

Seneqal Gömrük Xidmətinin başçısı Mouhamadou Makhtar Cisse Azərbaycanın gömrük işi sahəsindəki uğurları və təcrübəsini öyrənməyə hazır olduqlarını qeyd edərək, bu əməkdaşlığın daimi olacağına inandığını bildirib.

Həqiqət İSABALAYEVA

Baxış sayı: 647