İKT

Tarix:01/08/13

“MND xidməti mobil rabitə tariflərinə də təsirsiz olmayacaq”

"Azercell Telekom" şirkəti MND xidmətinin bazarın inkişafına müsbət təsir edəcəyinə əmindir. Belə ki, şirkətin Mətbuat xidmətinin məlumatına əsasən, MND xidmətinin tətbiqi nəticəsində "Azercell" Azərbaycan vətəndaşlarının ən yüksək şəbəkə xidmətlərini əldə etməsinə istiqamətlənib.

"Bildiyiniz kimi, Mobil Nömrə Daşınma Xidməti qonşu Türkiyə də daxil olmaqla artıq bir çox bazarlarda həyata keçirilib. Bu yenilik müştərilərə arzulanan qiymətə ehtiyacı olduğu xidməti daha rahat yolla əldə etməyə imkan verir.

"Azercell" şirkəti "TeliaSonera" şirkətlər qrupunun bir hissəsi olaraq MND layihəsi ilə dünya təcrübəsindən faydalanaraq Azərbaycan vətəndaşlarının bu xidmətdən maksimum faydalanmasını təmin edəcək. "Azercell" ölkənin ən iri mobil rabitə təminatçısı və mobil rabitə bazarının lideri olaraq müştərilərinə ən yaxşı müştəri xidmətini təqdim etməyi əsas tutur. Bizim müştərilərimizə təqdim etdiyimiz dəyər qarşılığında qiymət təklif edirik. Son illər ərzində "Azercell" öz tariflərini bir neçə dəfə aşağı salıb. MND xidməti mobil rabitə tariflərinə də təsirsiz olmayacaq",- deyə şirkətdə bildiriblər.

"Azercell" şirkətinin Mətbuat xidməti qeyd edib ki, qlobal təcrübəyə əsasən, şəbəkənin və müştəri xidmətlərinin keyfiyyəti, müştərilər üçün bir operatordan digərinə keçid zamanı əsas amil sayılır. Bu təcrübəni nəzərə alaraq "Azercell" şirkəti öz abunəçi bazasında yüksəliş olacağını gözləyir. Şirkət, eyni zamanda bəzi müştərilərin daha ucuz xidmətlərdən istifadə etməyə meyl edə biləcəyini istisna etmir, lakin yenə də təcrübənin göstərdiyi kimi, onların çox hissəsinin müəyyən müddətdən sonra əvvəl istifadə etdiyi operatora qayıdacağını proqnozlaşdırır.

Baxış sayı: 1291