İKT

Tarix:17/09/13

Bakıda Beynəlxalq İnternet Cəmiyyətinin rəsmi ofisinin açılması ilə bağlı telekonfrans keçiriləcək

Birləşmiş Millətlər Təşkilatının Bakı nümayəndəliyi bu həftə Beynəlxalq İnternet Cəmiyyətinin (Internet Society, ISOC) Azərbaycanda filialının yaradılması ilə bağlı növbəti danışıqlara start verəcək.

BMT-nin Bakı nümayəndəliyindən “ICTnews” xəbər xidmətinə verilən məlumata əsasən, həftənin sonuna kimi bu məsələnin müzakirəsi məqsədi ilə İSOC qərargahının nümayəndələrinin iştirakı ilə “Skype” üzərindən telekonfrans keçiriləcək.

“Azərbaycanda bu təşkilatın filialının funksiyalarını daşıyacaq qurum yaratmaq istəyən bir neçə iddiaçı var. ISOC ilə onun Azərbaycanda filialı funksiyasını daşıyacaq qurumlar arasında fikir ziddiyyəti əmələ gəlib və buna görə də filialın yaradılması məsələsi bir qədər yubadılır. Filial ölkədə internetin tənzimlənməsi üzrə fəaliyyət göstərən qurumların nəzdində yaradılmayacaq. Bu, tam yeni bir qurum olacaq ”,- deyə BMT-nin nümayəndəliyindən bildiriblər.

Qeyd edək ki, “ISOC” dünyada internetin açıq inkişafı, istifadəsi və təkamülü xeyrinə çıxış edən aparıcı qeyri-kommersiya təşkilatıdır. Bu qurum istifadəçilər, şirkətlər, hökumət nümayəndələri və digər təşkilatlar arasında internet siyasəti, texnologiyalar və qlobal şəbəkənin gələcək inkişafı ilə bağlı birgə dialoqlar təşviq edərək dünya üzrə internetin genişlənməsini təmin edir.

Aynur Vəliyeva

Baxış sayı: 1007