İKT

Tarix:30/09/13

“Nar Mobile” eşitmə qüsurlu vətəndaşlar üçün kompüterdən istifadə kurslarının tədris olunduğu DVD-lər paylayıb

Korporativ sosial məsuliyyət prinsiplərinə sadiq qalan “Nar Mobile” daha bir xeyriyyə təşəbbüsü ilə çıxış edib. Belə ki, hər il ənənəvi olaraq sentyabr ayının sonuncu həftəsində dünya miqyasında keçirilən Beynəlxalq Karlar Günü də “Nar Mobile” rəhbərliyinin diqqətindən yayınmayıb.

Beynəlxalq Karlar Günü münasibətilə keçirilmiş bayram tədbirini giriş sözü ilə Azərbaycan Karlar Cəmiyyətinin sədri Tapdıq Xalıqov açıb. Daha sonra çıxış edən sədrin 1-ci müavini Musa Tukanov və digər iştirakçılar tədbirin əhəmiyyətindən bəhs etmiş və göstərdiyi dəstəyə görə “Nar Mobile” mobil operatoruna öz təşəkkürlərini bildiriblər. Mərasimə qatılan “Nar Mobile” əməkdaşları isə iştirakçılara mobil operator tərəfindən eşitmə qüsurlular üçün xüsusi olaraq hazırlanmış kompüterdən istifadə videokursları – DVD-lər hədiyyə ediblər. Eşitmə qabiliyyəti məhdud şəxslərin cəmiyyətə qazandırılması istiqamətində göstərilən fəaliyyətin əhəmiyyətindən bəhs edən şirkətin ictimaiyyətlə əlaqələr və korporativ ünsiyyət üzrə rəhbəri Nigar Arpadarai, “Nar Mobile” mobil operatoru tərəfindən təşkil edilən kompüterdən istifadə videokurslarının üstünlüklərindən söhbət açıb.

Qeyd edək ki, videokurslar eşitmə və nitq qabiliyyəti məhdud olan şəxslər üçün ilkin hazırlıq xarakteri daşımaqla bərabər, onların ofis mühitinə tamamilə rahatlıqla adaptasiya olmaları üçün geniş imkanlar yaradacaq. “Microsoft Word”, “Microsoft Excel”, “Microsoft PowerPoint” və digər əsas kompüter proqramlarını tədris edən bu DVD-lər onlarda kompüter texnologiyaları haqqında baza biliklərinin formalaşmasına bilavasitə yardım edəcək.

RƏVAN

Baxış sayı: 1069