İNTERNET

Tarix:08/10/13

İran hakimiyyəti “Facebook” və “Twitter” şəbəkələrinə çıxışı açmaq niyyətində deyil

İranın rabitə və informasiya texnologiyaları naziri Mahmud Vazei bildirib ki, bu yaxınlarda prezident Həsən Ruhaninin vətəndaşların dünya şəbəkəsindən istifadə hüququ ilə bağlı verdiyi bəyanata baxmayaraq hökumət “Facebook” və “Twitter” sosial şəbəkələrinə çıxışı qanuniləşdirməyi planlaşdırmır. Bu barədə “France Press” agentliyi İran KİV-nə istinadən məlumat verib.
“Facebook” və “Twitter” kimi saytlara qadağanın ləğv olunması nəzərdə tutulmur”, - agentlik nazirin sözlərinə istinadən yazır.

İranda internet üzərində sərt senzura var. İstifadəçilər virtual şəbəkədən (virtual private network, VPN- İran vətəndaşlarının xüsusi proqramların köməyi ilə sosial şəbəkələrin saytlarına daxil olması üçün ölkə kənarında yerləşən kompüterlər) yararlanaraq bu qadağadan yayına bilirdilər. Lakin hökumət tədricən bu bağlantıların əksəriyyətini bağlamağa imkan verən üsullar işləyib hazırlamağa nail olub.

Sentyabrda İran Prezidenti “NBC” telekanalına müsahibə zamanı İranda internet üzərində qüvvədə olan senzuranın mümkün ləğvi ilə bağlı sualı cavablandırarkən bəyan edib ki, ölkədə vətəndaşların hüquqlarına dair komissiya yaradılacaq. Bununla yanaşı, o, komissiyanın funksiyasının nədən ibarət olacağını dəqiqləşdirməyib. Prezident əlavə edib ki, informasiyadan istifadə bütün insanların, o cümlədən iranlıların hüququdur, - “Novosti-Azerbaydjan www.novosti.az” yazır.

Baxış sayı: 1108