12px13px15px17px
Tarix:08/10/13

RİTN-də “Mən Azərbaycanlıyam” onlayn bilik yarışmasının sentyabr ayı üzrə qalibləri mükafatlandırılıb

Rabitə və İnformasiya Texnologiyaları Nazirliyində (RİTN) “Mən Azərbaycanlıyam” onlayn bilik yarışmasının sentyabr ayı üzrə 1-ci, 2-ci və 3-cü ongünlüklərin, həmçinin sentyabr ayının qaliblərini mükafatlandırma mərasimi keçirilib.
 
 Tədbirdə nazir müavini Elmir Vəlizadə qalib iştirakçıları təbrik edərək xatırladıb ki, “Mən Azərbaycanlıyam” onlayn bilik yarışması ümummilli lider Heydər Əliyevin anadan olmasının 90 illik yubileyinə həsr olunub və “İnformasiya-kommunikasiya texnologiyaları ili” çərçivəsində reallaşdırılır.
 
Yarışmanın məqsədi milli-mədəni irsimizin təbliği, bu sahədə marağın və biliklərin artırılması, vətənpərvərlik hisslərinin yüksəldilməsi olduğunu vurğulayan nazir müavini qeyd edib ki, burada bütün Azərbaycan vətəndaşları yaşından asılı olmayaraq iştirak edə bilər.
 
O, 4 ay ərzində yarışmaya qoşulanların sayının 91.823 nəfərə çatdığını qeyd edərək, bunu yarışa olan böyük marağın bariz nümunəsi kimi qiymətləndirib. Nazir müavini yarışda iştirak üçün qeydiyyatdan keçənlərin 65 faizinin kişi, 35 faizinin isə qadın istifadəçiləri olduğunu diqqətə çatdırıb.
 
E.Vəliyev xatırladıb ki, yarışma dekabr ayının 1-dək davam edəcək və dekabrın ilk həftəsi isə superfinal keçiriləcək: «Əvvəlki aylarda olduğu kimi, bu dəfə də yarışa təkcə paytaxtdan deyil, eyni zamanda bölgələrdən də qoşulanlar və qalib olanlar çoxdur. Biz bu ayın qaliblərinə fikir versək, onların əksəriyyətinin tələbə olduqlarını görərik».
 
 
Qeyd edək ki, ilk dəfə olaraq qaliblərin 6-sı bir ali məktəbin – Prezident Yanında Dövlət İdarəçilik Akademiyasının tələbəsi olub. Bu səbəbdən də tədbirə qatılan universitetin Həmkarlar İttifaqı Komitəsinin sədri Yusif Ağayev bildirib ki, “Mən Azərbaycanlıyam” onlayn bilik yarışması ölkənin tanıdılması, təbliği baxımından böyük əhəmiyyət kəsb edir. Gənclərin bu yarışmada iştirakının mühüm amil olduğunu önə çəkən Y.Ağayev universitetin 6 tələbəsinin sentyabr ayının qalibi olmasından məmnunluğunu ifadə edib.
 
 
Məlumat üçün bildirək ki, yarışın şərtlərinə uyğun olaraq ongünlüklərin qaliblərinə netbuk tipli kompüter, ilk 100-lüyə daxil olan digər iştirakçılara isə həvəsləndirici mükafatlar – “Nar Mobile” və “Bakcell” şirkətləri tərəfindən təqdim edilmiş 10 manatlıq mobil telefon danışıq kartları təqdim edilib. Sentyabr ayı ərzində yarışma iştirakçıları arasında ən yaxşı nəticə göstərmiş 3 nəfər sentyabr ayının qalibi seçilib. 1-ci yeri tutan Emilya Şalbuzova “iPhone” mobil telefonuna və mini- “iPhad” planşetinə, 2-ci yeri tutan Alim Nəcəfov “iPhone” mobil telefonuna, 3-cü yeri tutan Zərifə Adıgözəlova isə mini- “iPhad” planşetinə sahib olublar.
Yarışmaya oyunun rəsmi saytı (www.azerbaycanliyam.az) və «Facebook»dakı səhifəsi (https://apps.facebook.com/azerbaycanliyam/?fb_source=search&ref=ts&fref=ts) vasitəsilə qoşulmaq mümkündür.
 
Seymur Qasımbəyli



Baxış sayı: 918

© İstifadə edilərkən İctnews-a istinad olunmalıdır

Facebook Google Favorites.Live BobrDobr Delicious Twitter Propeller Diigo Yahoo Memori MoeMesto






29 Mart 2024

28 03 2024