İKT

Tarix:28/10/13

“Google” noyabrın 1-də “Nexus 5” və "şokoladlı Android”i təqdim edəcək

Noyabrın 1-də “Google” şirkəti “Nexus 5” smartfonunu və yeni ”KitKat” kod adlı “Android 4.4” əməliyyat sistemini təqdim edəcək.

“ICTnews” xəbər xidmətinin “www.podrobnosti.ua” saytına istinadən verdiyi məlumata əsasən, “Nexus 5” rəsmi buraxılış tarixi bildirilməsə də, onun haqqında, demək olar ki, hər şey məlumdur. Oktyabrın əvvəlində şəbəkəyə qurğunun təmiri üzrə daxili təlimat düşüb və bu təlimat “quqlofo”nun texniki xüsusiyyətləri haqda məlumatları açıqlayıb. Bir neçə həftə öncə isə “Google” şirkəti “səhvən” “Google Play” internet dükanında onun şəklini və qiymətini yerləşdirib.

Məlum olub ki, “Nexus 5” ağ korpusla təchiz ediləcək və onu “LG” şirkəti istehsal edəcək.
Ehtimal edilir ki, aparat 4,95 düymlük 1080 piksel ölçüdə ekrana, 4 nüvəli “Snapdragon 800” (2,3 hiqahers takt tezlikli) prosessora, 2 GB əməliyyat yaddaşına malik olacaq, LTE-şəbəkələri dəstəkləyəcək, 8 meqapikselli kamera ilə təchiz ediləcək.

O, eyni zamanda, Qi standartı üzrə simsiz enerjidoldurma funksiyasını dəstəkləyəcək.

Aynur Vəliyeva

Baxış sayı: 659