İKT

Tarix:01/11/13

“BETİM Birliyində innovasiya prosesləri” toplusu seriyasında yeni təqdimat planlaşdırılır

Beynəlxalq Elmi və Texniki İnformasiya Mərkəzinə (BETİM) üzv dövlətlərin Səlahiyyətli Nümayəndələr Komitəsinin (SNK) 65-ci iclasında "BETİM Birliyində innovasiya prosesləri" toplusu seriyasında "Energetika problemləri və qeyri-ənənəvi enerji mənbələri" beynəlxalq informasiya-analitik toplusunun VII nəşrinin şəbəkə layihəsinin hazırlanması və təqdimatı planlaşdırılır. Təqdimat 2013- cü ilin IV rübünün sonu - 2014-cü ilin əvvəlində BETİM mənzil-qərargahı tərəfindən üzv ölkələrin nümayəndələrinin iştirakı ilə həyata keçiriləcək.

Bununla bağlı qərar Səlahiyyətli Nümayəndələr Komitəsinin 64-cü iclasında verilib. "ICTnews" elektron xəbər xidmətinə bu barədə AMEA Elmi İnnovasiyalar Mərkəzindən (EİM) məlumat verilib. Mərkəzdən bildirilib ki, müasir qeyri-ənənəvi energetika milli iqtisadiyyatın elmi-texniki və innovativ inkişafını təmin edən əsas istiqamətlərdən biridir. Toplunun məzmunu müasir qeyri-ənənəvi (alternativ) enerjinin əsas problemləri, onun fiziki əsasları, kompüter modelləşdirməsinin istifadəsi, yeni enerji mənbələrinin yaradılması məsələlərinin yüksək elmi-texniki səviyyədə baxılmasına istiqamətlənib.

Kitabda elm və təhsil təşkilatlarında, BETİM-ə üzv olan və digər ölkələrin innovasiya sferası təşkilatlarında bu sahədə çalışan energetiklərin, alimlərin tədqiqat və işləmələrinin nəticələrinin göstərilməsi planlaşdırılır.

Qeyd edək ki, Azərbaycan da daxil olmaqla, BETİM-in üzv ölkələri sırasında 22 dövlət yer alıb. Beynəlxalq Elmi və Texniki İnformasiya Mərkəzinin mənzil-qərargahı Moskva şəhərində yerləşir. BETİM-in əsas vəzifəsi beynəlxalq əməkdaşlığa elm, texnologiya və biznes sahəsində informasiya, analitik, konsultasiya və təşkilati dəstəyin göstərilməsidir.

Həqiqət İSABALAYEVA

Baxış sayı: 809