İNTERNET

Tarix:14/11/13

Avtobus dayanacaqlarında pulsuz internetdən istifadə etmək olacaq

Azərbaycan paytaxtında növbəti pulsuz internet nöqtələri yaradılacaq. Bu dəfə Bakının avtobus dayanacaqlarına xüsusi avadanlıqlar quraşdırılacaq ki, onun vasitəsilə hər kəs beynəlxalq şəbəkəyə qoşula biləcək.

"ICTnews.az"-ın məlumatına görə, Nəqliyyat Nazirliyinin mətbuat xidmətinin rəhbəri Namiq Həsənov sözügedən məsələ ilə bağlı danışarkən qeyd edib ki, 2015-ci ildə Bakıda keçiriləcək I Avropa Olimpiya Oyunları ərəfəsində bütün avtobus dayanacaqlarında “Wi-Fi” sistemi quraşdırılacaq.

Onun sözlərinə görə, paytaxt sakinləri və ölkəyə gələn bütün turistlər bunun vasitəsilə internetdən pulsuz istifadə edə biləcəklər. N.Həsənov qeyd edib ki, bu sistemin tətbiqi birbaşa olaraq Nəqliyyatın İntellektual İdarəetmə Sisteminin nəzarəti ilə həyata keçiriləcək: “Avropa Olimpiya Oyunları ilə əlaqədar GPS naviqasiya sistemi, Beynəlxalq Avtovağzal Kompleksində turist-informasiya mərkəzləri quraşdırılacaq. Eyni zamanda ingilisdilli xüsusi könüllü qruplar təşkil olunacaq. Həmçinin, həm ana dilimizdə, həm də ingilis dilində yolların işarələnməsi nəzərdə tutulub”.

2015-ci ilin mayına qədər avadanlıqların quraşdırılması işlərinin başa çatacağını söyləyən N.Həsənov əlavə edib ki, Olimpiya Oyunlarından sonra da pulsuz internet sistemi fəaliyyətini davam etdirə bilər.

SEYMUR

Baxış sayı: 924