İNTERNET

Tarix:15/11/13

Azərbaycanın prosessinq mərkəzi yeni mobil xidmətin tətbiqinə başlayıb

“AzeriCard” prosessinq mərkəzi, Azərbaycan Beynəlxalq Bankı, “MasterCard” beynəlxalq ödəmə sistemi və “World Telecom” dükanlar şəbəkəsi ilə birgə ABB-nin “MasterCard” kart sahibləri üçün yeni “Mobile Payments” xidmətini təqdim edir. “ICTnews” elektron xəbər xidmətinin prosessinq mərkəzinə istinadən verdiyi məlumata görə, “Mobile Payments” vasitəsilə kart sahibləri “MobilBank” xidmətinin müvafiq menyusunu seçərək sürətli və təhlükəsiz ödənişlərini mobil telefonlarından fiziki kartdan istifadə etmədən həyata keçirə bilərlər.

“Mobile Payments” texnologiyası artıq bir çox Avropa bazarlarında tətbiq olunub. “MobilBank” xidməti istənilən debit və ya kredit kartının mobil platformaya (Android, iPhone, Blackberry və s.) inteqrasiyasını təmin etməklə mobil ödənişləri həyata keçirməyə imkan yaradır və mobil cihazın virtual ödəniş alətinə çevrilməsini təmin edir. Xidmətin əsas üstünlükləri arasında yüksək təhlükəsizliyi və rahatlığı, nağd vəsaitlərdən istifadə etməməyi, PİN kodun daxil edilməməsi və çeklərin imzalanmamasını qeyd etmək lazımdır. Bu xidmət və “MobilBank” sistemi vasitəsilə kart sahibi öz kartlarını daha geniş sayda ticarət və xidmət müəssisələrində istifadə etməyə imkanlar əldə edir və bununla öz gündəlik həyatını asanlaşdırır. Öz növbəsində isə ticarət və xidmət müəssisələri də mobil ödənişləri qəbul edərək öz müştəri bazasını və dövriyyələrini artırmaq üçün əlverişli imkanlar əldə edirlər.

CAHANGİR

Baxış sayı: 1075