İKT

Tarix:22/01/14

“Azərbaycan Dəmir Yolları” yeni elektron xidmət növlərini müəyyənləşdirir

Azərbaycan Respublikası Prezidentinin 23 may 2011-ci ildə imzaladığı “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Fərmanının dəmir yolunda icrasını təmin etmək məqsədi ilə “Azərbaycan Dəmir Yolları” Qapalı Səhmdar Cəmiyyətində İşçi Qrupu yaradılıb. İşçi Qrup QSC-də yeni elektron xidmət növlərinin müəyyən edilməsi və tətbiqi istiqamətində gərgin iş aparır.

“ICTnews” elektron xəbər xidmətinin xəbərinə görə, bu barədə “Azərbaycan Dəmir Yolları” QSC-nin sədri Arif Əsgərov YAP-ın rəsmi internet səhifəsinə verdiyi müsahibəsində danışıb. “Göründüyü kimi, Dövlət Proqramında nəzərdə tutulan işlərin həyata keçməsi nəticəsində qatarların hərəkətinin təhlükəsizliyi təmin ediləcək və hərəkət sürətinin yüksəldilməsi təmin olunacaq. Dövlət Proqramının preampulasında bu, çox dəqiq ifadə olunub:

“Ölkədə dəmir yolu nəqliyyat xidmətlərinə olan tələbatın tam ödənilməsi və ölkənin dəmir yollarının beynəlxalq nəqliyyat sisteminə inteqrasiyası üçün daha müasir nəqliyyat infrastrukturunun yaradılması, daşımalarda yük vahidinə nəqliyyat xərclərinin azalması, çevik tarif siyasətinin müəyyən edilməsi, Azərbaycanın tranzit potensialının artırılması, institusional islahatların aparılması, dəmir yolu nəqliyyatının fəaliyyətinə dair təkmil qanunvericilik bazasının formalaşdırılması, dəmir yolu sahəsi üçün yüksək ixtisaslı kadrların hazırlanması və onların sosial müdafiəsi təmin olunacaqdır”.

A.Əsgərov qeyd edib ki, növbəti illərdə də Dövlət Proqramının icrası ilə əlaqədar Azərbaycan Hökuməti tərəfindən “Azərbaycan Dəmir Yolları” QSC-nin qarşısında mühüm vəzifələr qoyulub: “Ümidvaram ki, qarşımızda duran vəzifələrin yerinə yetirilməsi istiqamətində kollektivimiz əzmlə çalışacaqdır”.

SEYMUR

Baxış sayı: 598