NRYTN

Tarix:29/01/14

Ötən il ölkə üzrə yatırılan investisiyaların 1,1faizi rabitə və informasiya sahəsinin payına düşüb

Dövlət Statistika Komitəsi Azərbaycan iqtisadiyyatının ən çox pul yatırılan sahələrini açıqlayıb. “ICTnews” elektron xəbər xidməti bildirir ki, komitənin ictimaiyyətə təqdim etdiyi rəqəmlərdə bir sıra məsələlərə işıq tutulub. Daxili investisiyaların çox hissəsinin dövlət müəssisələrinin payına düşdüyü məlum olub və eyni zamanda artımların olduğu aydınlaşıb.

Belə ki, 2013-cü il ərzində Azərbaycanda bütün maliyyə mənbələrindən iqtisadiyyatın və sosial sahələrin inkişafına yönəldilən vəsait 2012-ci illə müqayisədə 15,1% artıb.

“İnvestisiyaların ümumi həcmindən 76,7%-i il ərzində 11,9% artan daxili investisiyaların payına düşüb. Daxili investisiyaların çox hissəsi (70,7%) dövlət müəssisələrinin və təşkilatların, 29,3%-i isə özəl müəssisələrin payına düşüb”- deyə DSK-dan bildirilib.

Müəssisə və təşkilatların vəsaitləri hesabına əsas kapitala 8 012,1 milyon manat (investisiyaların ümumi həcminin 44,8%), bank kreditlərindən - 860,6 milyon manat (4,8%), büdcə vəsaitlərindən - 7 829,2 milyon manat (43,8%), büdcədənkənar fondların vəsaitləri hesabına - 558,7 milyon manat (3,2%), əhalinin şəxsi vəsaitlərindən - 469,1 milyon manat (2,6%) və başqa vəsaitlərdən - 142,4 milyon manat (0,8%) investisiya qoyulub.

Əsas kapitala qoyulmuş vəsaitlərdən 73% (13 047,3 milyon manat) qeyri-neft sektorunun inkişafına yönəldilib, ölkənin neft sektoruna 4 824,8 milyon manat (27%) sərmayə qoyulub. Göstərilən dövrdə qeyri-neft sektoruna əsaslı vəsaitlər 12,1%, neft sektoruna isə 24,2% artıb. Dövlət Statistika Komitəsindən bildirilib ki, bu dövrdə yatırılan investisiyaların 1,1faizi rabitə və informasiya sahəsinin payına düşüb.

SEYMUR

Baxış sayı: 822