İKT

Tarix:18/02/14

İnformasiya texnologiyaları idarəetmə sistemlərinin tətbiqi üzrə təlimlər keçiriləcək

Cari ilin 3-5 mart tarixlərində Standartlaşdırma, Metrologiya və Patent üzrə Dövlət Komitəsinin (SMPDK) Azərbaycan Standartlaşdırma və Sertifikatlaşdırma İnstitutu və Britaniya Standartlar İnstitutunun (BSİ) birgə təşkilatçılığı ilə BSİ-nin mütəxəssisi tərəfindən “İSO/İEC 20000 Information technology - Service management” standartının tətbiqi istiqamətində informasiya texnologiyaları idarəetmə sistemlərinin tətbiqi və daxili audit üzrə təlimlərin keçirilməsi nəzərdə tutulur.

Komitədən bildirilib ki, müasir informasiya texnologiyaları sahəsinin ən önəmli və daim yenilənməyə yönəldilmiş sistemlərindən biri informasiya texnologiyaları idarəetmə sistemidir və bu sistemi tənzimləyən “İSO/İEC 20000 Information technology - Service management” beynəlxalq standartlar toplusudur. “İSO/İEC 20000” standartı informasiya texnologiyaları (İT) xidmətlərinin idarəedilməsi üzrə əsas amilləri, onun müəssisələrdə dəstəklənməsi və həyata keçirilməsi istiqamətində tələb olunan məsuliyyəti ətraflı təsvir edir, biznesin tələblərinə uyğun olan və rəhbərliyin tam nəzarəti altında keyfiyyətli İT xidmətlərinin göstərilməsi istiqamətində məqsədli sistemin qurulmasını özündə cəmləşdirir.

Həmçinin daxili və xarici müştərilərə İT xidmətlərinin göstərilməsi üzrə prosedurların aydın təsviri “İSO/İEC 20000” standartında öz əksini tapır. Qeyd olunan standart İT İnfrastruktur Kitabxanasının (İTİL) ən uğurlu təcrübələri əsasında hazırlanıb. Standartın istifadəçiləri əsas fəaliyyət istiqaməti üçüncü tərəflərə (xidmət təşkilatları, sistem inteqratorları, proqram təminatı şirkətləri, hostinq şirkətləri, məlumat mərkəzləri, işəgötürmə və s.) İT xidmətləri göstərən şirkətlər, fəaliyyəti İT xidmətlərinin keyfiyyətindən asılı olan iri təşkilatlar, o cümlədən dövlət strukturları, telekommunikasiya, maliyyə strukturları və s.-dir.

Komitədən qeyd edilib ki, təlimləri müvəffəqiyyətlə bitirən iştirakçılar “İSO/İEC 20000 Information technology - Service management” standartının tətbiqi üzrə daxili auditor biliklərinə yiyələnmələri barədə Britaniya Standartlar İnstitutunun (BSİ) rəsmi sertifikatı ilə təltif olunacaqlar. Qeyd olunan təlimlərdə iştirak etmək istəyənlər 25 fevral 2014-cü il tarixinədək Azərbaycan Standartlaşdırma və Sertifikatlaşdırma İnstitutuna müraciət edə bilərlər. Daha ətraflı məlumatları qeyd olunan elektron poçt və əlaqə nömrələrinə ((012) 497 03 28; mob: (+994 55) 775-50-77; mob: (+994 50) 377-71-11; mob: (+994 55) 213-24-56; f.vakilov@azstand.gov.az; farid.hakimov@aqs.az; s.salimzade@azstand.gov.az) müraciət edərək əldə etmək olar.

Həqiqət İSABALAYEVA

Baxış sayı: 779