İKT

Tarix:07/03/14

Azərbaycanda daha bir xidmət “Elektron hökumət” portalı üzərindən göstəriləcək

Artıq dövlət müəssisə və təşkilatlarının, habelə tam özəlləşdirilməmiş səhmdar cəmiyyətlərinin və nizamnamə fondunda dövlət payı olan hüquqi şəxslərin balansında olan limitdən və tələbatdan artıq minik avtomobilləri və digər nəqliyyat vasitələrinin, o cümlədən normativ-istismar müddəti bitmiş, tam aşınmış, silinməli olan nəqliyyat vasitələrinin və avadanlıqların hərraclar vasitəsilə satışına aid müraciət və sənədlərin qəbulu “Elektron hökumət” portalı vasitəsilə aparılacaq.

“ICTnews” elektron xəbər xidmətinin məlumatına görə, Əmlak Məsələləri Dövlət Komitəsinin göstərdiyi elektron xidmət hərraclarda hüquqi və fiziki şəxslərin iştirakının təmin olunması üçün onların qeydə alınması, sifarişlərin qəbulu, seçdiyi əmlakın ilkin satış qiymətinin 10 faizi həcmində behin ödənilməsi ilə bağlı qaydaları müəyyən edir.

Elektron xidmətin yerinə yetirilməsinə nəzarəti Hərracların Təşkili üzrə Auksion Mərkəzinin rəhbəri həyata keçirir.

Hərracda iştirak etmək üçün sifariş forması doldurulur. Təqdim edilən məlumatlar qəbul edilir, operator tərəfindən elektron xidmətlər reyestrinə daxil edilərək qeydə alınır və aidiyyəti şöbəyə göndərilir.

Məsul şöbədə sifarişə və əlavə edilmiş sənədlərə baxılır. İstifadəçi tərəfindən təqdim edilən sənədlərdə imtina üçün əsas olmayan və aradan qaldırılması mümkün olan çatışmazlıq aşkar edildikdə bu barədə istifadəçiyə 3 gündən gec olmayaraq yazılı məlumat verilir. Çatışmazlıqlar 1 gündən gec olmayaraq aradan qaldırıldıqdan və bu barədə Hərracların Təşkili üzrə Auksion Mərkəzinə məlumat verildikdən sonra elektron xidmət göstərilir və istifadəçiyə hərracda iştirakçı olub-olmaması barədə müvafiq bildiriş göndərilir.

Hərrac baş tutduğu təqdirdə qalib iştirakçıya hərrac komissiyasının protokolu və digər sənədlər təqdim edilir. Hərrac baş tutmadıqda, habelə hərracın digər iştirakçıları, beh ödənilməsinə baxmayaraq hərracda iştirak etməmiş və qalib olmayan hüquqi və fiziki şəxslər tərəfindən ödənilmiş beh təşkilatçı tərəfindən 10 bank günü müddətində qaytarılır.

CAHANGİR

Baxış sayı: 953