İKT

Tarix:18/06/14

Mərkəzi Kitabxanada informasiya texnologiyaları infrastrukturunun qurulması prosesi davam edir

Azərbaycan Milli Elmlər Akademiyasının (AMEA) "Ultra Computers” şirkəti ilə əməkdaşlıq çərçivəsində yeni Mərkəzi Kitabxana - İnformasiya Resursları Mərkəzində informasiya texnologiyaları infrastrukturunun qurulması prosesi davam edir.

Hazırda AMEA ilə şirkət arasında 125 vahid İT avadanlığın təhvil-təslimi həyata keçirilir. Mərhələli həyata keçirilən təhvil-təslim prosesinin ilk mərhələsində avadanlığın fiziki mövcudluğu və kitabxananın İnformasiya Resursları Mərkəzində (İRM) yerləşdirilməsinin təsdiqi mərhələsi başa çatdırılıb.

Növbəti mərhələlərdə isə avadanlıqların işləməsi və bir-biri ilə inteqrasiyası yoxlanılır. Kitabxananın ictimaiyyətlə əlaqələrə məsul əməkdaşı Ruslan Kərimov qeyd edib ki, hal-hazırda bununla əlaqədar İRM, “Ultra Computers” şirkəti və AMEA-nın İnformasiya Texnologiyaları İnstitutunun nümayəndələrindən ibarət komissiya qiymətləndirmə aparır.

Şirkətin müəssisədə tətbiq etdiyi mərkəzləşdirilmiş vahid kitabxana sistemi kitabxanadaxili prosesləri və kitabxana-oxucu münasibətlərini tam avtomatlaşdıracaq. Sistemdə oxucuların qeydiyyatı, kitabların sifarişi və alınması, oxucu yerləri üzrə hesabatlılıq, kataloqlaşdırma, arxivləşdirmə, komplektləşdirmə kimi proseslərin izlənilməsi öz əksini tapıb.

Həqiqət İSABALAYEVA

Baxış sayı: 684