12px13px15px17px
Tarix:05/08/14

Azərbaycanlı nümayəndə Türkiyənin texnopark təcrübəsi ilə tanış olub

Azərbaycan Milli Elmlər Akademiyasının (AMEA) İnformasiya Texnologiyaları İnstitutunun şöbə müdiri, dosent Əlövsət Əliyev Türkiyənin İstanbul şəhərində elmi-praktiki ezamiyyətdə olub.
 
İnstitutdan verilən məlumata görə, səfər Azərbaycan Prezidenti yanında Elmin İnkişafı Fondu və Rabitə və Yüksək Texnologiyalar Nazirliyinin birgə “İKT-2” qrant layihəsi olan “Azərbaycanda innovativ informasiya iqtisadiyyatının formalaşmasının analizi və inkişafı üzrə tövsiyələrinin işlənilməsi” çərçivəsində baş tutub. Əsas məqsəd innovativ iqtisadiyyatın formalaşmasında Türkiyə universitetlərinin təcrübəsini öyrənmək, xüsusən yeni iqtisadi mühitdə formalaşan elmi-texnoloji texnoparkların fəaliyyətləri ilə yaxından tanış olmaq olub.
 
 Səfər çərçivəsində İstanbul, İstanbul Texniki və Yıldız Texniki universitetlərinin əsas fəaliyyət istiqamətləri ilə tanışlıq həyata keçirilib. Yıldız Texniki Universitetinin texnoparkının baş direktoru Dr. prof. Mahmut Karamanla keçirilən görüş zamanı tərəflər təmsil etdikləri qurumların strukturu, maliyyələşmə mənbələri, elmi tədqiqatların kommersiyalaşdırılması problemləri, yeni innovasiya texnologiyaları, İKT infrastrukturu, e-hökumət layihələri, startap firmaları, elmi inkubatorlar haqqında ətraflı məlumatlar veriblər. Həmçinin Yıldız Texnoparkının inzibati işlər direktoru Erdem Yurtsevenin müşayiəti ilə texnopark və orada olan 200-dək müxtəlif profilli firmalarla tanışlıq həyata keçirilib.
 
Sonda hər iki qurumun nümayəndəsi gələcəkdə də əməkdaşlıq əlaqələrinin davam etdiriləcəyinə əminliklərini ifadə edərək birgə layihələr, konfrans və seminarlarda iştirakın vacibliyini vurğulayıblar.
 
CAHANGİR



Baxış sayı: 647

© İstifadə edilərkən İctnews-a istinad olunmalıdır

Facebook Google Favorites.Live BobrDobr Delicious Twitter Propeller Diigo Yahoo Memori MoeMesto






28 Mart 2024

27 03 2024