İNTERNET

Tarix:21/08/14

ABŞ-da insanın vəfatından sonra internetdə yerləşdirilən məlumat hesablarının varislik hüququ haqqında qanun qəbul edilib

ABŞ-ın Delaver ştatı insanın vəfatından sonra onlayn servislərdə və internetdə yerləşdirilən məlumat hesablarının varislik hüququ haqqında qanun qəbul edərək presedent yaradıb. Bu barədə qanunun internetdə yerləşdirilən mətnində deyilir.

Ştat qubernatoru Cek Markell tərəfindən imzalanan qanunda göstərilir ki, istifadəçinin vəsiyyətinin həyata keçirilməsinə məsul olan hüquqşünas ailənin müəyyən üzvünə onun elektron poçtuna, sosial şəbəkə hesablarına, servis abunələrinə, “bulud” saxlanclarına və internetdə yerləşdirilən digər məlumatlara çıxışa imkan yarada bilər.

Eyni zamanda, “The Wall Street Journal” nəşri qeyd edir ki, yeni qanun ABŞ federal qanunvericiliyinin normaları ilə ziddiyyət təşkil edə bilər. Belə ki, 1986-cı ildə qəbul olunmuş qanun istifadəçilərin elektron rabitəsini təmin edən şirkətlərə məlumat sahibinin razılığı və ya hakimiyyətin qərarı olmadan məlumatların açıqlanmasını qadağan edir.

Qeyd edək ki, artıq bir sıra onlayn servislər fərdi məlumatlardan istifadə siyasətində vəfat etmiş istifadəçilərin hesablarının işi ilə bağlı məsələni nəzərə alır. Dünyasını dəyişən istifadəçinin ailə üzvləri “Google”, “Twitter” və “Facebook” şirkətlərinin inzibatçılarına müvafiq sənədləri təqdim etməklə onun hesablarını deaktiv etmək xahişi ilə müraciət edə bilərlər. Lakin servislər əksər hallarda bilavasitə hesab məlumatlarına çıxışa imkan vermirlər, - “Lenta” www.lenta.ru yazır.

Baxış sayı: 655