İKT

Tarix:02/09/14

2014-cü ildə qlobal smartfon tədarükü 1.2 milyardı ötəcək

"Futuresource Consulting" analitik şirkətinin məlumatına görə, 2013-cü ildə smartfonların tədarükü 50 faiz artaraq 1 milyardı ötüb. Ekspertlər hesab edirlər ki, 2014-cü ildə smartfonların tədarük həcmi daha 19 faiz artaraq 1,2 milyardı ötəcək.

"Futuresource Consulting" şirkətinin analitiki Oliver Rauntri istifadəçilərin tədricən daha böyük ekranlı mobil telefonlara keçidini qeyd edib. Belə ki, ötən il satılmış smartfonların əksəriyyətində ekranların diaqonalı 4-5,5 düym təşkil edib.

"ICTnews" elektron xəbər xidməti "dailycomm.ru" saytına istinadən bildirir ki, ekspert, həmçinin "fablet"lərin (ekranının diaqonalı 5,5 düymdən çox olan smartfonlar) populyarlığına diqqət yetirib. Ötən il belə aparatlar Cənub-Şərqi Asiyada yüksək tələbatlı olub, amma başqa bazarlarda bu məhsula tələbat az olduğundan qlobal satış həcmində fabletlərin bazar payı 6 faiz təşkil edib.

"Futuresource Consulting" şirkətinin mütəxəssisləri hesab edirlər ki, cari ildə fabletlər bazarda böyük paya sahiblənəcək, müxtəlif mobil məzmunun mümkünlüyü nəticəsində bu form-faktor istehlakçılar üçün cəlbedici olacaq.

Smartfon seqmentində müsbət dinamikanın saxlanmasına baxmayaraq, analitiklər bir çox inkişaf etmiş bazarların "doyma" həddinə çatması haqda xəbərdarlıq ediblər.

Bundan başqa, Oliver Rauntri ən böyük smartfon bazarı olan Çində tempin aşağı düşməsi haqda məlumat verib.

Tədqiqatda, həmçinin adi mobil telefonların satış həcminin çox sürətli azalması haqda məlumat verilib. 2013-cü ildə yalnız 710 milyon adi mobil telefon satılıb ki, bu da ötən illə müqayisədə 20 faiz azdır. Bununla belə, mütəxəssislər hesab edirlər ki, bir sıra inkişaf etməkdə olan bazarlarda bu aparatlara hələ tələbat var.

Emil Hüseynov

Baxış sayı: 1350