İKT

Tarix:03/09/14

“Microsoft Azərbaycan” və Yüksək Texnologiyalar Parkı arasında Anlaşma Memorandumu imzalanıb

“Microsoft Azərbaycan” və Rabitə və Yüksək Texnologiyalar Nazirliyinin tabeliyində Yüksək Texnologiyalar Parkı arasında Anlaşma Memorandumu imzalanıb.

Anlaşma Memorandumu çərçivəsində tərəflər innovativ texnologiyaların araşdırması və inkişafına İKT-nin tətbiqi istiqamətində imkanların yaradılması sahəsində əməkdaşlıq edəcəklər. Əməkdaşlıq bir sıra sahələri əhatə edəcək.

Buraya bacarıq və peşəkar tədris, sənaye əməkdaşlığı və innovasiyalar vasitəsilə texnoloji təkamülün sürətlənməsi və yerli proqram təminatı iqtisadiyyatının stimullaşdırılması istiqamətində “Microsoft” və Yüksək Texnologiyalar Parkı arasında tərəfdaşlıq kimi istiqamətlər daxildir.
Tərəflərin nəzərdə tutulan rollarına gəlincə, hal-hazırda mövcud müzakirələr əməkdaşlığın həyata keçirilməsi ilə bağlı “Mirosoft”un üzərinə müvafiq vəzifələr qoyur. Bu vəzifələr özündə yerli İKT şirkətləri üçün intellektual kapital və insanların texniki və biznes təlimlər imkanlarına yönəlmiş bacarıq inkişafı proqramları və tələbələr üçün strukturlaşdırılmış məşğulluq proqramları ilə dəstək; “Microsoft BizSpark” Şəbəkə Proqramı, texnoloji tədbir və proqramlar vasitəsilə texnoloji inkişafı sürətləndirməsi üçün nəzərdə tutulmuş məzmun və xidmətlərlə dəstək; Yüksək Texnologiyalar Parkının rezidentləri üçün mövcud “Microsoft” lisenziyalaşdırma proqramları üzrə müvafiq məlumatla dəstəyi ehtiva edir.

Yüksək Texnologiyalar Parkının üzərinə düşən vəzifələrə gəlincə, bunlar “Microsoft IT Academy” və “Microsoft Virtual Academy” vasitəsilə “Microsoft”un təhsil məzmununun Yüksək Texnologiyalar Parkının rezidentləri üçün təbliğində dəstək; Yüksək Texnologiyalar Parkının rezidentləri arasında “Microsoft”un texnoloji tədbir və proqramlarının təbliğində dəstək; Yüksək Texnologiyalar Parkının rezidentləri tərəfindən lisenziya proqram təminatından istifadəsinin təşviqində köməklik göstərmək kimi istiqamətlərdən ibarətdir.

Həqiqət İSABALAYEVA

Baxış sayı: 876