NRYTN

Tarix:13/09/14

Vidadi İsmayılov dünyasını dəyişdi

Rabitə və Yüksək Texnologiyalar Nazirliyi “Aztelekom” İstehsalat Birliyində İctimaiyyətlə əlaqələr üzrə baş mütəxəssis vəzifəsində çalışan həmkarımız Vidadi İsmayılov vəfat edib. Bu barədə Respublika Yanıq Mərkəzindən məlumat verilib. Vidadi İsmayılov uzun müddət “Aztelekom” İB-də çalışıb. Çalışdığı müddətdə nizam-intizamı və səmərəli fəaliyyəti ilə diqqət çəkib.

Səmimi, istiqanlı, mehriban xarakteri ilə insanların qəlbinə yol tapan mərhum bu gün dəfn olunacaq.

Rabitə və Yüksək Texnologiyalar Nazirliyinin, eləcə də “Aztelekom” İstehsalat Birliyinin rəhbərliyi və kollektivi Vidadi İsmayılovun ölümündən kədərləndiyini bildirir və mərhumun ailəsinə dərin hüznlə başsağlığı verir. Allah rəhmət etsin!

Qeyd edək ki, sentyabrın 8-də saat 06:30 radələrində Abşeron rayonunun Xırdalan şəhərində beşmərtəbəli yaşayış binasında partlayış baş verib.

Qubadlı rayonundan olan məcburi köçkünlərin məskunlaşdıqları binanın ikinci mərtəbəsindəki mənzildə baş vermiş partlayış barədə daxil olmuş məlumat əsasında FHN və Baş Prokurorluğun rəhbərliyi, rayon prokurorluğunun, rayon Polis Şöbəsinin, FHN-in Yanğından Mühafizə və Xüsusi Riskli Xilasetmə Xidmətinin əməkdaşları dərhal hadisə yerində olub, mütəxəssislər cəlb edilməklə hadisə yerinə baxış keçirilib, dağıntılar altında qalan şəxslərin xilas edilməsi istiqamətində təxirəsalınmaz tədbirlər həyata keçirilib.

Faktla bağlı rayon prokurorluğunda Cinayət Məcəlləsinin 225.2 (Yanğın təhlükəsizliyi qaydalarını pozma) və 314.2-ci (Səhlənkarlıq) maddələri ilə cinayət işi başlanmış, prokurorluq və FHN-in Əməliyyat-İstintaq İdarəsinin əməkdaşlarından ibarət istintaq qrupu yaradılıb. İş üzrə zəruri istintaq hərəkətləri aparılıb, o cümlədən müvafiq ekspertizalar təyin edilib.

Hadisənin ağır nəticələrə səbəb olması nəzərə alınaraq iş üzrə istintaqın davam etdirilməsi Baş Prokurorluğun Ağır cinayətlərə dair işlər üzrə istintaq idarəsinə tapşırılıb.

Baxış sayı: 1982