NRYTN

Tarix:16/09/14

Türk kanalları “Azerspace-1” peyki üzərindən yayımlanacaq

11-14 sentyabr tarixlərində İstanbulda keçirilən "CeBİT – Avrasiya" İnformasiya Texnologiyaları Sərgisində iştirak edən "Azərkosmos" ASC tədbir zamanı bir sıra önəmli müqavilələr imzalayıb.

Bu müqavilələrdən şirkət üçün ən əhəmiyyətlisi Türkiyənin "NEBA" şirkəti ilə türk kanallarının "Azerspace-1" peyki üzərindən yayımlanmasına dair imzalanmış müqavilədir.

İmza mərasimində iştirak edən Azərbaycan Respublikasının rabitə və yüksək texnologiyalar nazirinin birinci müavini İltimas Məmmədov qeyd edib ki, türk kanallarının Azərbaycan peyki üzərindən yayımlanmasına böyük önəm veririk və bu bizim üçün sevindirici hadisədir.

"NEBA" şirkətinin baş direktoru Mustafa Serez mövzu ilə bağlı açıqlamasında bildirib ki, "Azerspace-1"-in Azərbaycanda və regionda gücü mübahisə olunmazdır, izləyici nüfuzetməsi 90 faizə yaxındır. "Peykin texnoloji imkanları ən yüksək səviyyədədir. Bu cür güclü peyk operatoru ilə əməkdaşlıq etdiyimiz üçün çox məmnunuq".

Qeyd edək ki, türk kanallarının ilk siqnalı bu ilin sentyabr ayında veriləcək. İki qardaş ölkə arasında baş tutan bu əməkdaşlıq Türkiyə kütləvi informasiya vasitələrində geniş işıqlandırılıb və türk kanalları üçün açılmış yeni pəncərə kimi qiymətləndirilib.

Qeyd edək ki, Qafqazda yeganə peyk operatoru olan "Azərkosmos" ASC rəqəmli yayım, VSAT şəbəkələri və digər telekommunikasiya xidmətlərinin göstərilməsi üçün peyk tutumları təqdim edir. Ötən ilin fevral ayında orbitə buraxılan və "Azərkosmos" tərəfindən idarə edilən "Azərspace-1" peyki 46° Şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir.

Baxış sayı: 2374