İKT

Tarix:16/10/14

Elektron kənd təsərrüfatı sahəsində Çexiya ilə Azərbaycan əməkdaşlıq edə bilər

Azərbaycan elektron kənd təsərrüfatı sahəsində Çexiya ilə əməkdaşlıq edə bilər. “ICTnews” elektron xəbər xidmətinin məlumatına görə, bununla bağlı kənd təsərrüfatı naziri Heydər Əsədov və Çexiya Deputatlar Palatasının vitse-spikeri, Çexiya-Azərbaycan parlamentlərarası dostluq qrupunun sədr müavini Voytex Filipi arasında müzakirələr aparılıb.

Nazir H.Əsədov yeni sistemlərin kənd təsərrüfatında tətbiq olunmasını və bununla əlaqədar hüquqi bazanın və bu məqsədlə işçi qrupunun yaradılmasını xüsusilə qeyd edərək bildirib ki, Azərbaycanda elektron kənd təsərrüfatı sisteminin yaradılmasında, logistik bazaların və aqroparkların yaradılmasında, kadr hazırlığında birgə əməkdaşlıq məqsədəuyğundur. Əməkdaşlığın daha da genişləndirilməsi istiqamətində təkliflərini verən H.Əsədov qeyd edib ki, iki ölkə arasında aqrar sahədə müqavilə-hüquq bazasının yaradılması, informasiya və təcrübə mübadiləsinin aparılması və sair məsələlərin həyata keçirilməsi arzuolunandır.

Azərbaycanın tarixən aqrar ölkə olduğunu, müstəqillik əldə etdikdən sonra iqtisadiyyatımızın yüksək templə inkişaf etdiyini, ölkəmizin aqrar sahədə çox böyük nailiyyətlərə imza atdığını və qeyri-neft sektorunda kənd təsərrüfatının prioritet sahə olduğunu bildirən nazir ölkələrimizin parlamentləri arasında olan sıx əməkdaşlığı yüksək qiymətləndirərək digər sahələrdə olduğu kimi, kənd təsərrüfatı sahəsində də bu əlaqələrin genişlənməsinin vacibliyini vurğulayıb.

Voytex Filipin də Azərbaycanla Çexiya arasında digər sahələrdə olduğu kimi, kənd təsərrüfatı sahəsində də qarşılıqlı əlaqələrin daha da genişlənməsinə önəm verdiyini bildirib. O, ölkəsində kənd təsərrüfatının inkişafı barəsində ətraflı məlumat verərək Azərbaycan məhsullarının Çexiyaya ixrac olunmasında maraqlı olduqlarını və birgə əməkdaşlığa önəm verdiklərini qeyd edib.

SEYMUR

Baxış sayı: 763